گۇئانتانامودىكى ئۇيغۇرلارنىڭ ئامېرىكا فېدېرال سوتىدا گۇۋاھلىقتىن ئۆتۈشى تەلەپ قىلىندى

بۇ گۇئانتانامودىكى تۇتقۇنلارغا مۇناسىۋەتلىك قويۇپ بېرىش ئەرزىدە تۇنجى قېتىم داۋاگەرلەرنىڭ ۋاشىنگتونغا چاقىرتىلىپ، سوت مەھكىمىسىدە گۇۋاھلىقتىن ئۆتۈشىنى تەلەپ قىلىش بولۇپ ھېسابلىنىدۇ.

ئامېرىكىنىڭ ۋاشىنگتون رايونىدىكى فېدېرال سوت مەھكىمىسىنىڭ سوتچىسى رىكاردو ئۇربنا 10 ‏ - ئاينىڭ 7 ‏ - كۈنى گۇئانتانامودىكى 17 نەپەر ئۇيغۇرنىڭ كېلەچىكىگە مۇناسىۋەتلىك ئەرزىنى كۆرۈپ چىقماقچى ئىدى.

سوت كۈنى يېتىپ كېلىشتىن 4 ھەپتە بۇرۇن تۇتقۇنلارنىڭ ئادۋوكاتلىرى يۇقىرىقى 17 نەپەر تۇتقۇننىڭ ئىچىدىكى 4 كىشىنىڭ ۋاشىنگتونغا كېلىپ گۇۋاھلىق بېرىشىنى، قالغان 13 كىشىنىڭ سوتنى گۇئانتانامودا تۇرۇپ تېلېفوندا ئاڭلىشىنى تەلەپ قىلغان. لېكىن ئامېرىكا ئەدلىيە مىنىستىرلىقى گۇئانتانامودىكى ھەر قانداق بىر تۇتقۇننى ئامېرىكا زېمىنىغا ئېلىپ كېلىشكە قارشى تۇرماقتا.

كۆزەتكۈچىلەرنىڭ پەرەز قىلىشىچە، ئامېرىكا دۆلەت مۇداپىئە مىنىستىرلىقى، ئۇيغۇر تۇتقۇنلارنىڭ ئىچىدىكى 5 كىشىنىڭ " دۈشمەن جەڭچىسى " دېگەن قالپىقىنى ئېلىپ تاشلىغان بولسىمۇ، لېكىن ئادۋوكاتلارنىڭ 4 نەپەر ئۇيغۇرنى سوتقا چاقىرتىش تىرىشچانلىقى ئامېرىكا ئەدلىيە مىنىستىرلىقىنىڭ قارشى تۇرۇشىغا ئۇچرىشى مۇمكىن.

سوتچى ئۇربنا ئۇيغۇرلارنى سوتقا چاقىرىش ياكى چاقىرماسلىقنى تېخى قارار قىلمىغان. ئەگەر سوتچى چاقىرتىشنى قارار قىلسا ئەدلىيە مىنىستىرلىقى ۋە بەش بۇرجەكلىك بىنا سوتنىڭ قارارىغا بويسۇنۇشى كېرەك.