Хитай албанийини гүәнтанамудин қоюп берилгән уйғурларни өткүзүп беришкә йәнә үндиди


2006.05.09
Share on WhatsApp
Share on WhatsApp

Гүәнтанамодин қоюп берилгән 5 нәпәр уйғурға албанийә сиясий панаһлиқ бәргәндин кейин, хитай ташқи ишлар министирлиқи сәйшәнбә күни албанийә билән америкини тәнқид қилди вә албанийә даирилиридин бу 5 нәпәр уйғурни хитайға өткүзүп беришни йәнә тәләп қилди.

Хитай ташқий ишлар министирлиқиниң сәйшәнбә күни елан қилған баянатида әскәртишичә, бейҗиң даирилири америка билән албанийигә наразилиқ билдүргән. Хитай ташқи ишлар министирлиқиниң баянатчиси лю җйәнчав, " бу 5 киши һәргиз сиясий мусапир әмәс. Улар гуманлиқ шәрқий түркистан террорчилири" дәп көрсәтти.

Лю җйәнчавниң әскәртишичә, бейҗиң һөкүмити бу гуманлиқ бәш кишини җуңгоға өткүзүп бериши керәк, дәп қарайдикән. Лю җйәнчав, америка билән албанийиниң һәрикити хәлқара қанунлар вә б д т хәвпсизлик кеңишиниң мунасивәтлик қарарлириға ашкара хилап " дәйду. Лекин у , буниң қайси хәлқара қанунларға хилап икәнликини чүшәндүрмиди.

Америка бу 5 нәпәр уйғурни "дүшмән җәңчиси әмәс" дәп ақлиған. Бу хитай даирилириниң бу 5 нәпәр уйғур өткән җүмә күни теранаға йетип барғандин бери 2 - қетим уларни өткүзүп беришни тәләп қилишидур. Буниң алдида хитайниң албанийидә турушлуқ баш әлчиси тйән чаңчүн, албанийә һөкүмитидин бу бәш нәпәр уйғурни өткүзүп беришни рәсмий тәләп қилғанлиқини елан қилған. Лю җйәнчав сәйшәнбә күнки баянатида "шәрқий түркистан хәлқара террорлуқ күчлириниң бир қисими, уларниң әл қаидә вә талибан билән йеқин мунасивити бар " дәйду.

Шәрқий түркистан, уйғурлар тарихта қурған вә әслигә кәлтүрмәкчи болуватқан дөләтниң сиясий- җуғрапийиви нами. Лекин лю җйәнчав бу йәрдә немә үчүн сиясий- җуғрапийиви бир намни террорчи тәшкилат сүпитидә қолланғанлиқини чүшәндүрмиди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.