Xitay albaniyini güentanamudin qoyup bérilgen Uyghurlarni ötküzüp bérishke yene ündidi


2006.05.09
Share on WhatsApp
Share on WhatsApp

Güentanamodin qoyup bérilgen 5 neper Uyghurgha albaniye siyasiy panahliq bergendin kéyin, xitay tashqi ishlar ministirliqi seyshenbe küni albaniye bilen amérikini tenqid qildi we albaniye da'iriliridin bu 5 neper Uyghurni xitaygha ötküzüp bérishni yene telep qildi.

Xitay tashqiy ishlar ministirliqining seyshenbe küni élan qilghan bayanatida eskertishiche, béyjing da'iriliri amérika bilen albaniyige naraziliq bildürgen. Xitay tashqi ishlar ministirliqining bayanatchisi lyu jyenchaw, " bu 5 kishi hergiz siyasiy musapir emes. Ular gumanliq sherqiy türkistan térrorchiliri" dep körsetti.

Lyu jyenchawning eskertishiche, béyjing hökümiti bu gumanliq besh kishini junggogha ötküzüp bérishi kérek, dep qaraydiken. Lyu jyenchaw, amérika bilen albaniyining herikiti xelq'ara qanunlar we b d t xewpsizlik kéngishining munasiwetlik qararlirigha ashkara xilap " deydu. Lékin u , buning qaysi xelq'ara qanunlargha xilap ikenlikini chüshendürmidi.

Amérika bu 5 neper Uyghurni "düshmen jengchisi emes" dep aqlighan. Bu xitay da'irilirining bu 5 neper Uyghur ötken jüme küni téranagha yétip barghandin béri 2 - qétim ularni ötküzüp bérishni telep qilishidur. Buning aldida xitayning albaniyide turushluq bash elchisi tyen changchün, albaniye hökümitidin bu besh neper Uyghurni ötküzüp bérishni resmiy telep qilghanliqini élan qilghan. Lyu jyenchaw seyshenbe künki bayanatida "sherqiy türkistan xelq'ara térrorluq küchlirining bir qisimi, ularning el qa'ide we taliban bilen yéqin munasiwiti bar " deydu.

Sherqiy türkistan, Uyghurlar tarixta qurghan we eslige keltürmekchi boluwatqan döletning siyasiy- jughrapiyiwi nami. Lékin lyu jyenchaw bu yerde néme üchün siyasiy- jughrapiyiwi bir namni térrorchi teshkilat süpitide qollan'ghanliqini chüshendürmidi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet