Ismayil emet amérikining Uyghur tutqunlarni xitaygha qayturup bermigenlikini tenqid qildi


2006-05-12
Share

Uyghur aptonom rayonining sabiq re'isi, xitay xelq qurultiyining mu'awin mudiri ismayil emet jüme küni amérikini güentanamodin qoyup bérilgen 5 neper Uyghurni xitaygha qayturup bermigenliki üchün, amérikini yer shari térrorluqqa qarshi kürishike tosqunluq qilmaqta, dep eyiblidi.

Ismayil emetning eskertishiche, xitay 2001 we 2002 - yilliri afghanistanda esir élin'ghan bu 5 Uyghurlarni " gumanliq térrorchilar", dep qaraydiken. U, "méningche amérika térrorluqqa qarshi küreshke qosh ölchem ishlitiwatidu. Biz buni qobul qilalmaymiz " deydu. Uyghur aptonom rayoni xelq qurultiyi ismayil emetni 1985 - yildiki saylamda aptonom rayonning re'islikige yene bir qétim körsitishke tirishqan bolsimu, lékin béyjing da'irilirining namzati tömür dawametni ret qiliwétishqa jür'et qilalmighan idi.

Ismayil emet ilgiri "meschitke kirip namaz oqumaqchi bolghan dölet kadirliri ma'ashini meschitttin alsun " dégen sözliri bilen Uyghur jama'etchilikining diqqitini qozghighan shexs. U, bu qétim béyjingda chet'el metbu'atlirigha güentanamodin gunahsiz, dep qoyup bérilgen bu 5 Uyghurni "ular taliban we el qa'ididin telim terbiye alghan" dédi. Ularni " esebiy térrorchilar," dep tekitligen ismayil emet, "ular qanun boyiche jazalinishi kérek " deydu. Lékin u, bu kishilerning térrorchi ikenlikige ispati barliqini sorighan bir muxbirgha ularning afghanistanda tutulghanliqining özi yiterlik, dep jawab bergen.

Gu'antanamodin qoyup bérilgen 5 neper Uyghur musapiri ötken jüme küni albaniyige orunlashturuldi. Lékin xitay hökümiti bu 5 kishini xitaygha ötküzüp bérish heqqide albaniye hökümitige bésim ishletmekte.

Albaniye axbarat agéntliqining xewer qilishiche, albaniye hökümiti Uyghur musapirlarni xitaygha ötküzüp bérish toghrisida albaniye parlaméntidiki bezi öktichi küchlerning bésimigha duch kelmekte. Albaniye hökümiti bu 5 Uyghurgha siyasiy panaliq bérish - bermeslik mesiliside hazirghiche bir qarargha kelmigenlikini bildürgen. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet