Америка дөләт мәҗлисидә уйғур вә тибәт мәсилисини тема қилған гуваһлиқ бериш йиғини чақирилди


2006.04.18
Share on WhatsApp
Share on WhatsApp
rabiye-guwahliq.jpg
Рабийә қадир ханим гуваһлиқ бериш йиғинида. RFA

Хитай дөләт рәиси ху җинтав америкида елип баридиған 4 күнлик зиярити башланған сәйшәнбә күни, америка дөләт мәҗлисиниң кишилик һоқуқ гурупписи уйғурлар вә тибәт мәсилисини асасий тема қилған гуваһлиқ бериш йиғини чақирди.

Йиғинда хәлқара уйғур кишилик һоқуқ вә демократийә фонди җәмийитиниң рәиси рабийә қадир гуваһлиқ берип, уйғур аптоном районида " өзиниң хитай асасий қанунидики һоқуқини ипадиләшкә урунған һәр қандақ киши трагедийилик ақивәткә дуч кәлмәктә " деди. Йиғинда уйғурларниң сиясий һоқуқи тоғрисида сөз ечишниң хәтәрлик болуп қалғанлиқини тәкитлигән рабийә қадир, " болупму 11 - синтәбир террорлуқ вәқәсидин кейин хитай һөкүмитиниң уйғурлар үстидин елип барған қирғинчилиқи техиму қәбиһ түс алди" дәйду.

Рабийә қадирниң әскәртишичә, хитай һөкүмити уйғур сиясий мәһбуслириға давамлиқ өлүм җазаси бәрмәктә. У, хитай даирилириниң исмайил сәмәткә өлүм җазаси бәргәнликини, бәзи уйғурларниң таяқ зәрбисидин түрмиләрдә өлүп кетиватқанлиқини оттуриға қоюп, бәзи уйғур мәһбусларниң җаза муддити тошқандин кейинму давамлиқ тутуп турулуватқанлиқини әскәртти. Рабийә қадирниң әскәртишичә, уйғурларға қаритилған туғутни контрол қилиш сиясити трагедийилик түс алған . У, " миңлиған уйғур анилар, қосақтики 7 - 8 айлиқ һәтта 9 айлиқ уйғур бовақлар туғутни контрол қилиш сияситиниң қурбаниға айланмақта " деди.

Рабийә қадир, чәтәлдики уйғур муһаҗирларниң вәтәндә яшайдиған аилә - тавабатлири хитай һөкүмити тәрипидин бесимға учраватқанлиқини әскәтти һәмдә америка һөкүмитиниң бейҗиң даирилиригә уйғурлар мәсилисидә техиму еғир бесим ишлитишини тәләп қилди. Бу қетимқи йиғинға хәлқара кәчүрүм тәшкилати, хәлқара тибәт һәрикити вә чегрисиз мухбирлар тәшкилати қатарлиқ органларниң вәкиллири иштирак қилди вә гуваһлиқ бәрди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт