Тәклимаканда буниңдин 2000 йил илгири овланған 98 түрлүк омуртқилиқ һайван тепилди

2006-01-20

Хитай вә франсийилик мутәхәссисләрдин тәркип тапқан бир археологийилик тәкшүрүш өмики, тәклимаканниң мәркизи бәлвиғида буниңдин 2000 йил бурун овланған 98 түрлүк явайи һайванниң үлгисини байқиған. Тәкшүрүш хизмити хитай пәнләр акадимийиси билән франсийә мәркизи асия иниститутиниң археологлири тәрипидин елип берилмақта.

Тәкшүрүш өмики керийә дәряисиниң төвән еқимида қидириш елип берип, белиқ, су вә қуруқлуқта яшайдиған һайванлар, өмүлигүчиләр, учар қушлар вә вәһши һайванлар түрини байқиған. Буларниң ичидә һазир нәсли қуруп кәткән қара йилпиз, яркәнт тошиқини, ғаҗиғучи һайванлар, бөдүнә вә пахтәк қатарлиқлар бар.

Шинхуа ахбарат агентлиқиниң хәвәр қилишичә, франсийә - хитай археологийә мутәхәссислириниң бирләшмә тәкшүрүш хизмити 1993 - йили башланған болуп, бу айда ахирлишидикән. Мутәхәссисләр керийә дәрясиниң җәнубидин шималиғичә болған 200 километир даиридә тәкшүрүш елип барған.

Археологийилик тәкшүрүш өмкидики хитай пәнләр акадимийисиниң тәтқиқатчиси ма миңниң ашкарилишичә, улар қумуш қатарлиқ бәзи муһим өсүмлүкләрни байқиған. У, сүний һәмрадин тартилған рәсимләр вә нәқ мәйдандики тәкшүрүшкә қариғанда, буниңдин 2000 йил илгири тәклимакан чөллүки дәря вә өсүмлүкләр билән қапланған, нурғун һайванлар яшайдиған җай икәнлики мәлум болмақта, дәйду. Хитай даирилири тәклимакан районида көп қетим археологийилик тәкшүрүшләр елип барған болсиму, әмма буниң көп қисими ашкара елан қилинмиди. (Әркин)