Ömür hejge mangghan Uyghur bowayni pakistanda oghrilar pulsiz qoydi


2006.08.14
Share on WhatsApp
Share on WhatsApp

Ayali bilen birge ömür hejge mangghan 81 yashlardiki bir Uyghur bowayning 6 ming dollar pulini pakistanning rawalpindi shehiride düshenbe küni oghrilar buliwélip, seper üstidiki bu bowayni pulsiz qoydi.

Pulidin ayrilghan boway oghrilarning birini tutuwalghan, lékin pulini élip qachqan yene bir oghri qéchip ketken. Hesenjan ismayil isimlik bu boway ayali patigül ibrahim bilen birge se'udi erebistan'gha bérip ömri hej qilish üchün buningdin 3 kün ilgiri Uyghur aptonom rayonining qaramay shehiridin pakistan'gha kelgen idi. U, düshenbe küni rawalpindiki yatiqidin talagha téléfon qilish üchün chiqqanda ikki adem uning kiyimige nijaset sürkiwétip, etraptiki bir meschitke kiyimini tazilash üchün bashlap barghan we boway kiyimini sélip tazilawatqanda bu ikki kishi uning belwighidiki pulni élip qachqan. Boway we uning hemrasi oghrilarning birini tutuwélip saqchigha élip barghan bolsimu, lékin pulni alghan yene bir oghrini tutalmidi. Weqe yüz bergen jaydiki saqchi ponkitining bir xadimi muxbirimizgha oghrini sürüshtürüwatimiz, dédi.

Lékin pulini bulutup qoyghan boway we uning etrapidiki Uyghurlar pakistan saqchilirini bu dilogha köngül bölmidi, dep eyiblimekte. Ularning eskertishiche, saqchilar tutulup qalghan oghrigha nahayiti nazaket bilen mu'amile qilghan. Weqege munasiwetlik kishiler diloni pakistandiki xitay elchixanisigha melum qilmighan. Shu jaydiki weziyettin xewerdar bir Uyghur muhajirning eskertishiche, weqeni junggo elchixanigha melum qilghan teqdirdimu buning paydisi yoq iken. U," bu xil weqeler ilgiri köp qétim yüz berdi. Biz junggo elchixanisigha melum qilghan bolsaqmu, lékin ular perwa qilipmu qoymighan idi" deydu. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.