Хитай һөкүмити өз алдиға һәҗгә беришни қаттиқ чәклимәктә


2005-12-07
Share

Хитай һөкүмити бу йил хитайдин һәҗгә баридиған мусулманлар саниниң 6900 гә йәткәнликини билдүрди һәмдә бу өмәкниң 1979 ‏- йилидин буян, хитайдин һәҗгә баридиған әң чоң өмәк һесаблинидиғанлиқини көрсәтти.

Хитай ислам җәмийитиниң билдүрүшичә, бу йил үрүмчи, бейҗиң қатарлиқ төт шәһәрдин мәккигә бивастә учидиған айрупиланларниң сани 20 гә көпәйтилгән. Һәҗ қилғучилар бу айниң 15 ‏- күнидин 27 ‏- күнигичә илгири- кейин болуп, мәккигә йитип бариду.

Әмма бу арида, дуня уйғур қурултийиниң баянатчиси дилшат ришит, хитай һөкүмитиниң шәхсләрниң өз алдиға һәҗгә беришини қаттиқ чәкләватқанлиқини билдүрди.

Дилшат ришитниң мәлум қилишичә, ақсу вилайәтлик җамаәт хәвпсизлик идариси һәҗ мәзгилиниң йеқинлишиши билән һәр қайси наһийилик җамаәт хәвпсизлик орунлириға мәхсус уқтуруш чүшүрүп, шәхсийләрниң өз алдиға һәҗгә чиқиш рәсмийәтлирини беҗиришни чәкләш, туғқан йоқлаш вә сода билән чәткә чиқидиғанларниң рәсмийәтлирини қаттиқ тәкшүрүп беҗиришни тәләп қилған.

Вилайәтлик җамаәт хәвпсизлик идариси уқтурушида йәнә, йеза- кәнтләрдики җамаәт хәвпсизлик хадимлирини өз тәвәликидики паспорти бар кишиләрни из қоғлап тәкшүрүп, амал бар уларниң паспортлирини йиғивелиш, йиғивалалмиғанлардин чәткә чиқмаслиқ капаләт хети вә 5000 миңдин 10000 йүәнгичә капаләт соммиси елишни көрсәткән.

Дуня уйғур қурултийиниң баянатчиси дилшат ришит, "хитай һөкүмити хәлқара кишилик һоқуқ хитабнамисигә хилап һалда, уйғурларниң кишилик әркинликини боғиватиду. Уйғурларни бир тәрәптин мәҗбурий пуқралиқиға қошувелип, йәнә бир тәрәптин пуқралиқ һоқуқи бәрмәйватиду" дәп әйиблиди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт