Xotende tunji qar keltürüp chiqarghan apet hélihem dawamlashmaqta


2008-02-08
Share

Bu yil qish pesli Uyghur élining jenubidiki bir qisim jaylargha apetlik bir pesil bolmaqta . Chünki ötken ayning otturiliridin bashlap Uyghur élining xoten,qeshqer, aqsu we bayin'ghulinning bir qisim jaylirida adettin tashqiri soghaq hawa éqimining tesiri bilen bu yil qish kirgendin buyanqi tunji qar yaghdi. Hetta teklimakan qumluqining bir qisim jaylirighimu qélin qar yéghip , xelqqe, charwa mallargha ziyan saldi. Xoten diyarida -17 yanwar kéchidin bashlap yéghip ikki üch kün dawamlashqan qarda , bezi jaylar éghir qar apiti hem shiddetlik soghaq hawa éqimning tesirige uchrighan . Gerche Uyghur éli hökümet axbaratliri, da'irilerning ammini bu qétimliq soghaq hawa hem qar apitidin jiddiy qutquzup qalghanliqini xewer qiliwatqan bolsimu , bizning xoten tewesidin téléfon arqiliq igiliginimizdin melum bolushiche, qar apitining tesiri hazirgha qeder dawamlishiwatqan bolup, hetta qehritan soghaq sewebidin adem ölüsh ehwallirimu körülgen , shundaqla xitayning chaghan bayrimi harpisida apettin qutquzush ishliri asasen toxtap qalghan.

Uyghur ilide xitayning jenubidiki ammigha i'ane toplash ishliri jiddiy élip bérilmaqta

Melum bolghandek xitayning jenubidiki 17 ölke , sheherlerde yüz bergen qar apiti xitayning barliq axbarat shundaqla teshwiqat organlirining merkizi nuqtisigha aylandi , bu heqtiki xewerler toxtimay élan qilinmaqta . Emma oxshashla waqitta Uyghur ilining qeshqer, qizilsu, xoten qatarliq jaylirida yüz bergen qar apitige unche diqqet bérilmigen bolup, hetta Uyghur élining yerlik xewer torliridimu yenila xitayning jenubida soghaq hem qar apitide qalghan ammini qutquzush heqqidiki xewer hem chaqiriqlar asasiy salmaqni igiligen. Shundaqla jem'iyettiki her saheler buyiche xitayning jenubidiki qar apitide qalghan ammigha i'ane toplash ishliri jiddiy élip bérilmaqta .

Halbuki ötken ayning otturiliridin bashlap Uyghur élining jenubida dawam étiwatqan qar hem shiddetlik soghaq hawa kélimati Uyghur éli tarixida 33 yildin buyan körülüp baqmighan éghir apetlerni keltürüp chiqiriwatqanliqi melum .

Shinjang radi'o istansisi -7 féwral " qeshqer , qizilsu , xoten qatarliq jaylarda apetke uchrighan amma muwapiq orunlashturuldi , qutquzush xizmetliri etrapliq teshkillendi" dégen témida xewer élan qildi, mezkur xewerde bu jaylarda hazirghiche 300 ming ademning apetke uchrighanliqi, 44 ming 550 ming tuyaq charwa malning ölgenliki , buningdin kélip chiqqan iqtisadi ziyanning 87 milyon yüendin éship ketkenliki melum qilin'ghan.

Chaghanda hökümet xadimlirining perwayi pelek

Xewerde yene , Uyghur élining xelqni apettin qutquzushqa mes'ul da'iriliri bir milyon yüendin artuq meblegh , 105 tonna kömür hemde 113 tonna ashliq hem kiyim ‏- kécheklerni her qaysi apet rayonliridiki ammining qoligha yetküzülgenliki teshwiq qilin'ghan.

Xotenning hökümet torida bérilgen qisqa uchurdin melum bolushiche,xoten bu qétimliq qar apiti bir qeder éghir bolghan jaylarning biri hésablinidu, yeni -17 yanwar xoten'ge bu yil kirgendin buyanqi tunji qar yaghdi , shundaqla bu apetlik qar boldi, chünki qar bilen teng tuyuqsiz kelgen soghaq éqim tesiride, hawa témpératurisi biraqla yigirme nechche sélsiye giradus töwenlep , qarning qélinliqi bezi jaylarda 15 , 16 santimétirdin éship ketken. Biz xitayning chaghan bayrimiliq dem élishi mezgilide,xotende apettin qutquzush ishlirining tesirge uchrighan ‏- uchrimighanliqi , qar apitide qalghanlargha yardem bérish pa'aliyetlirining qandaq orunlashturulghanliqi heqqide yenimu tepsiliy melumat élishqa tirishtuq .

Xitayning bahar bayrimiliq dem élishi mezgilide , barliq memuriy organlar gerche bir heptilik dep élishqa qoyup bérilgen bolsimu , Uyghur xadimlar kündilik nöwetchilikke qoyilidighan ehwal omumlashqan bolghachqa ,gerche xotende -8 féwral kech sa'et 10din ashqan bolsimu , biz yenila xoten wilayetlik hökümetning ishxanisigha téléfon qilip sinap körduq , nöwetchilikte turuwatqan bir xadimning érengsizliqi bizni heyran qildi. Xoten wilayetlik mehkimining xelq ishlirigha mes'ul yene bir ishxanisigha téléfon qilduq.

Munasiwetlik da'irilerdin tepsiliy melumatqa ige bolalmighandin kéyin biz yene qar apiti bir qeder éghir bolghan jaylardin xotenning guma nahiyisidiki ammidin ehwal igileshke tirishtuq , déhqanlar soghaqta hetta adem ölüsh hadisiliri körülgenlikini éytti.

Hörmetlik radi'o anglighuchilar, yuqirida siler bu qétim Uyghur élining jenubida yüz bergen qar apitining tesirige uchrighan xotenning apet ehwali heqqide igiligen melumatlarni anglidinglar. Bu heqte yene dawamliq tepsiliy melumatlar igileshke tirishimiz.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet