Manas nahiyilik sot mehkimisi "qara xumdanchilar" gha höküm élan qildi


2007.09.14

Uyghur aptonom rayonining manas nahiyilik sot mehkimisi peyshenbe küni mezkur nahiyidiki bir qara xumdanda ishchilarni qullar emgikige sélish weqesi üstidin höküm élan qilip, 3 xitayni muddetlik qamaq jazasigha höküm qildi. Sot mehkimisi manas nahiyisidiki weqe yüz bergen xumdanni kötürige éliwalghan nyu pemililik ikki kishi bilen jung pemililik bir kishini, ishchilarni qullar emgikige sélish weqeside jawabkarliqi bar, dep qaridi.

Sotning hökümnamiside jawabkarlar ishchilarni mejburiy emgekke sélish, normidin köp ishlitish, haqaretlesh, ten jazasi bérish, xarlash, ish heqqini bermeslik, ach qoyush, ékspilatatsiye qilish, kishilik erkinlikini boghush qatarliq jinayetler bilen eyiblinip, ayrim - ayrim bir yildin 3 yilghiche qamaq jazasigha höküm qilindi.

Bu yilning bashliri xitay metbu'atliri shenshidiki qara xumdanliqlarda kishilerning qullar emgikige séliniwatqanliqini, bu kishiler arisida ösmürler we nérwa késellerning barliqini ashkarilighandin kéyin, bu weqe xitayning memliket ichi we sirtida zor ghula-ghula peyda qilip, xitay merkizi hökümiti weqeni tekshürüsh we jawabkarlarni qet'iy bir terep qilishni buyrighan. Hetta shenshidiki qara xumdanliqtin mejburiy emgekke sélin'ghan bir neper Uyghur tépilghan idi.

Shenshidiki qara xumdan weqesidin kéyin, bezi metbu'atlar Uyghur aptonom rayonining manas nahiyiside qara xumdan barliqini we bu yerde kishilerning qullar emgikige séliniwatqanliqini pash qildi. Lékin weqe pash qilin'ghandin kéyinmu manas nahiyilik j x da'iriliri radi'omizgha manas nahiyiside qara xumdan bayqalghanliqini inkar qilghan idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.