Kanada metbu'atlirida hüsenjan jélilgha a'it xewerler bésilmaqta

Kanada puqrasi Uyghur hüsenjan jélilning yoqap ketkinige 100 kündin ashqan bu mezgilde, kanada metbu'atlirida uninggha a'it yézilghan xewerler arqa-arqidin bérilip turdi. Kanadadiki "toronto yultuzi" gézitide 5‏- iyol küni élan qilin'ghan bir parche maqalide, hüsenjan jélilning teqdirige bolghan endishe otturigha qoyulghan.

" Yoqap ketken kanadaliqning a'ilisidikiler ümidsizlenmekte" dégen mawzuda élan qilin'ghan bu maqalide körsitilishiche, hüsenjan jélilning xitaygha qayturulghanliqi melum bolghandin kéyin, uning adwokati kris makli'odning kanada bash ministirigha hüsenjan mesilisi üchün xitaygha mexsus wekiller ömiki ewetishni telep qilip yazghan xéti hazirghiche jawabsiz qalghan.

Bash ministir bayanatchisi, bash ministirning bu xetni tapshurup alghanliqini étirap qilsimu, lékin buninggha jawab qayturush üchün qanchilik waqit kétidighanliqini éniq bildürmigen. Hüsenjanning adwokati kris eger bash ministirdin mushu hepte axirighiche jawab alalmisa, u chaghda özining xitaygha baridighanliqini bildürdi.

Kanada hökümiti ötken seyshenbe küni xitay emeldarlirining qoligha déplomatik nota sunup, hüsenjan jélilning qeyerdilikini sorighan. Emma xitay da'iriliri hazirghiche buninggha inkas qayturmidi. (Peride)