Hüseyin jélil ürümchide sotqa tartildi


2007-02-05
Share

Xitay hökümiti, ötken yili 6‏- ayda özbékistan hökümiti teripidin xitaygha tapshurup bérilgen kanada puqrasi hüseyin jélilni ötken jüme küni sotlashqa bashlighan.

Hüseyin jélilning ayali kamile xanimning sotqa qatnashqan uruq-tughqanlirining sözlirini neqil keltürüshiche, sot jeryanida sotchilar hüseyin jélildin, kanadaning qaysi shehiride yashaysen? qanche balang bar? xitay sirtidiki Uyghurlar qandaq pa'aliyetler bilen shughulliniwatidu? ottura sherqte qanche yil yashiding? dégen'ge oxshash so'allar sorighan.

Kamile xanimning bildürüshiche, 6 sa'et dawamlashqan sot jeryanida, qarilighuchilar hüseyin jélilni eyibleydighan héchqandaq pakit otturigha qoyalmighan. Ten salametliki yaxshi körün'gen hüseyin jélil sotta xitay hökümiti teripidin tutup bérilgen adwokatni ret qilip, özem kanadaliq bir adwokat tutushni xalaymen, dégen.

Kamile xanimning éytishiche, sotqa kanada hökümitining héchqandaq wekili qatnashmighan. Sot héchqandaq netijisiz axirlashqan bolup, sotning qachan dawamlishidighanliqi heqqidimu héchqandaq melumat bérilmigen.

Köpchilkke melum bolghandek, xitay hökümitining kanada puqrasi höseyin jélilni qolgha élip, kanada elchixana xadimlirining uning bilen körüshüsh teleplirini ret qilishi, xitay hökümiti bilen kanada otturisida diplomatik bir sürkilishke seweb bolmaqta.

Hazirghiche, kanada bash ministiri sitifan harpér qatarliq kanada rehberliri, xitay rehberliri bilen uchrishishlirida bir nechche qétim hüseyin jélil mesilisini otturigha qoyup, xitay hökümitidin uni qoyup bérishni telep qildi. Ötken ay xitayni ziyaret qilghan kanada tijaret ministiri déwid imizsn we maliye ministiri jim flaherti yene hüseyin jélil mesilisini otturigha qoyghan idi. (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet