Höseyin jélilning qollighuchiliri yéngi adwokat üchün heriket bashlatti

Xitay türmiside tutup turuluwatqan kanada puqrasi höseyin jélilni erkinlikke érishtürüsh üchün kanadada heriket élip bériwatqan pa'aliyetchiler, xitay hökümiti teripidin höseyin jélilge bérilgen adwokatning sotta uni qoghdiyalmaydighanliqini bildürüp, uninggha yéngi bir adwokat tutup bérish üchün heriket bashlatqan. Ular kanada tashqi ishlar minstirliqigha höseyin jélilning musteqil bir qanun meslihetchige ige bolushini tewsiye qilghan.

Kanadada chiqidighan Globe and Mail gézitining xewer qilishiche, kanada-Uyghur birleshmisning re'isi memet toxti, 26‏- féwral küni höseyin jélilni qollawatqanlargha bir xet ewetip, ularni höseyin jélilgha xitayda musteqil bir adwokat tutush üchün pul i'ane qilishqa chaqirghan. Memet toxtining mölcherlishiche, xitayda höseyin jélilgha wekalet qilalaydighan bir adwokat tépish üchün 12000 dolar etrapida pul kérek iken. Memet toxti, yéngi bir adwokat héch bolmisa, höseyin jélilni aqlash üchün, sotqa hökümet teripidin belgilen'gen adwokat sunalmighan höjjetlerni sunushi mumkin, dégen.

Xewerde éytilishiche, höseyin jélil özbékistan hökümiti teripidin xitaygha tapshurup bérilgendin béri, uni qutquzush üchün jiddiy pa'aliyet élip bériwatqan xelq'ara kechürüm teshkilatining kanada shöbisining mudiri alks newe, xitayda musteqil bir adwokat tutushning özila nahayiti murekkep bir jeryan dégen.

Xitay hökümiti, ötken yili iyunda özbékistan hökümiti teripidin xitaygha tapshurup bérilgendin béri‏ iz‏-déreksiz yoq bolup ketken höseyin jélilni bu ayning bashlirida sotlashqa bashlighan idi. Sotta, térrorluq we bölgünchilik pa'aliyetlerge qatnashqan dep eyiblen'gen höseyin jélil, bu eyibleshlerni ret qilghan.

Xitay hökümitining, kanada hökümitining pütün teleplirige pisent qilmay,kanada puqrasi höseyin jélilni tutup turushi, xitay bilen kanada munasiwetlirini jiddiyleshtürmekte. (Qanat)