Höseyin jélilning tutqun qilin'ghanliqining 1 yilliqi munasiwiti bilen namayishi ötküzüldi

Kanada Uyghur jem'iyitining re'isi memet toxtining bergen melumatigha qarighanda, 4-ayning 1-kuni Uyghur kanada jem'iyitining orunlashturushida xitay türmisidiki höseyin jélilning gunahsiz tutqun qilin'ghanliqining 1 yilliqi munasiwiti bilen torontodiki xitay konsulxanisi aldida naraziliq namayishi ötküzülgen.

Namayishqa Uyghurlardin bashqa yene, höseyin jélilning yéqinliri, kanadaliq dostliri hemde ezerbeyjan we turk qérindashliridin terkip tapqan 40 tin artuq kishi qatnashqan.

Namayish jeryanida, namayishchilar xitay hökümitige bolghan naraziliqlirini ipadileydighan shu'arlarni towlighandin bashqa, xitaylarning sherqiy türkistandiki depsendichilik siyasitini qattiq eyibligen.

Namayishqa türlük axbarat wastiliridin kelgen muxbirlarmu ishtirak qilghan. Toronto star, burlington post we höseyin jélil heqqidiki höjjetlik filim ishlewatqan kübek muxbirlirimu alahide montré'aldin kilip bu pa'aliyetni toluq süretke alghan.

Gerche hawa nahayiti yamghurluq bolghan bolsimu, balilar we xanimlarning bu namayishta körsetken qizghinliqi köpchilikni ilhamlandurghan. Namayishqa höseyin jélilning xanimi kamile xanimmu burlingtondin kilip qatnashqan. Ikki sa'et dawam qilghan namayish chüshtin kiyin sa'et 3 etrapida tinch- amanliq ichide axirlashqan. (Jüme)