"Biz bu déloni shundaqla boldi qilmaymiz "

‏19 ‏- April kanada puqrasi Uyghur siyasiy pa'aliyetchi höseyin jélil xitayda muddetsiz qamaq jazasigha höküm qilin'ghan idi. Shuningdin kéyin kanada terep bu ishqa qarita herxil inkaslarni qayturushqa bashlidi.

Kanada nati'onal post gézitide 20 ‏- april bérilgen xewerdin melum bolushiche, mezkur xewerni höseyin jélilning ayali kamile xanimgha ürümchide höseyin jélil bilen körüshüsh istikide saqlawatqan kanadaning xitayda turushluq elchixana xadimliri yetküzgen.

Bu xewer kamile xanimni intayin chüchütken. Kamile xanim mundaq deydu: "adil bolmighan. Lékin, men u kanadagha, öyge qaytip kelgüche ümidimni uzmeymen".

Emma, kanada tashqi ishlar ministiri, peter mkkay ning bu nöwetlik xitay ziyaritide höseyin jélil mesilisini otturigha qoyidighanliqi toghrisida wede bérip urghan téléfoni kamile xanimning hijranliq qelbige umid nuri ata qilghan.

Xewerde qeyt qilishiche, siyasiy pa'aliyetchi höseyin jélil özbékistanda qolgha élin'ghandin buyan ottawa- béyjing munasiwetlirige dez ketken.

"Biz bu déloni shundaqla boldi qilmaymiz " deydu kanada tashqi ishlar ministiri peter mékkay. Uning bildürüshiche yene, höseyin jélil délosi kanada ‏- xitay munasiwetlirige mu'eyyen tesir körsitidiken.

Béyjing pétr mékkayni xitayda 3 kün ziyarette bolush jeryanida höseyin jélil mesilisini tilgha almasliq heqqide alliburun agahlandurghan. Xitay tashqi ishlar ministirliqi bayanatchisi "biz kanadaning bu ishni kötürüp chiqip dölitimizning ichkiy ishlirigha arilashmasliqini ümid qilimiz. Kanada höseyin jélil délosining pütünley xitayning ichkiy ishi ikenlikidin ibaret mewqesini éniq chüshinish kérek" dégen.

Höseyin jélil késimi élan qilinip sotxanidin yalap élip chiqip kétilish jeryanida anisigha "bularning hemmisi yalghan. Héchqaysisi rast emes. Bayam oqup ötülgen hökümnamining héchnémisini qobul qilmaymen " dep xitab qilghan.

Sot we höküm élan qilishqa qatnishishqa béyjingdin ürümchige kelgen kanada elchixana xadimlirining sotqa kirishi ret qilin'ghan. (Jüme)