Һөсәйин җелил қолға елинғандин буян тунҗи қетим аниси билән көрүшүшкә муйәссәр болди


2007.09.04

Канадада чиқидиған йәршари вә почта гезитиниң 4 - сиентәбирдики хәвиригә қариғанда , канада пуқраси һөсәйин җелил хитай даирилири тәрипидин рәсмий қолға елинған 18 айдин буян ,түнүгүн тунҗи қетим униң аниси һәм сиңлиси билән көрүшүшигә рухсәт берилгән.

Хитай даирилири һөсәйин җелилни террорчилиқ вә миллий бөлгүнчилик җинайити билән әйибләп , бу йил априлда униңға муддәтсиз қамақ җазаси елан қилған.

Хитай даирилири һөсәйин җелилниң аниси вә ача ‏- сиңиллиридин бириниң , үрүмчидин 70 километир йирақлиқтики түрмидә һөсәйин җелилни йоқлишиға рухсәт бәргән .Уларниң көрүшүши бир саәт ичидә чәкләнгән.

Канада уйғур җәмийитиниң рәиси мәмәт тохтиниң билдүрүшичә , һөсәйин җелил аниси һәм сиңлиси билән көрүшкәндә улар билән чиң қучақлишип, бир қанчә минутқичә гәп ‏- сөз қилмай көз йеши төккән.

Һөсәйин җелил 2005 - йили өзбекистанлиқ аяли билән биргә канада пуқралиқиға өткән. Өткән йили у канада паспорти билән өзбекистанға туғқан йоқлашқа барғинида , өзбекистан даирилири тәрипидин қолға елинип хитайға тапшуруп берилгән иди ,хитай даирилири хели мәзгилгичә һөсәйин җелил мәсилисини мәхпий тутуп кәлди , бу пәйттә һөсәйин җелилниң хитай түрмисидә қаттиқ қийин ‏- қистақ һәм тән җазасиға учриғанлиқи мәлум.

Хитай сақчилири һөсәйин җелилниң анисиға һөсәйин җелилниң мушу бир ай ичидә башқа түрмигә йөткилидиғанлиқини билдүргән.

Канада уйғур җәмийитиниң рәиси мәмәт тохти " хитай һөкүмитиниң һөсәйин җелилни башқа түрмигә йөткәйдиғанлиқи , һөсәйин җелилниң қоюп берилиш мәсилисидә хитай һөкүмитиниң барлиқ қануний йолларни пүтүнләй тосайдиғанлиқидин дерәк бериду " дәйду.

Нөвәттә , хитай һөкүмитиниң һөсәйин җелилниң канада пуқралиқ салаһийитини етрап қилмай униңға җаза көрүш мәсилиси, канада билән хитайниң дипломатик мунасивитидики өткүр ихтилапларниң бири болуп кәлмәктә. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.