Höseyin jélil qolgha élin'ghandin buyan tunji qétim anisi bilen körüshüshke muyesser boldi

Kanadada chiqidighan yershari we pochta gézitining 4 - siéntebirdiki xewirige qarighanda , kanada puqrasi höseyin jélil xitay da'iriliri teripidin resmiy qolgha élin'ghan 18 aydin buyan ,tünügün tunji qétim uning anisi hem singlisi bilen körüshüshige ruxset bérilgen.

Xitay da'iriliri höseyin jélilni térrorchiliq we milliy bölgünchilik jinayiti bilen eyiblep , bu yil aprilda uninggha muddetsiz qamaq jazasi élan qilghan.

Xitay da'iriliri höseyin jélilning anisi we acha ‏- singilliridin birining , ürümchidin 70 kilométir yiraqliqtiki türmide höseyin jélilni yoqlishigha ruxset bergen .Ularning körüshüshi bir sa'et ichide cheklen'gen.

Kanada Uyghur jem'iyitining re'isi memet toxtining bildürüshiche , höseyin jélil anisi hem singlisi bilen körüshkende ular bilen ching quchaqliship, bir qanche minutqiche gep ‏- söz qilmay köz yéshi tökken.

Höseyin jélil 2005 - yili özbékistanliq ayali bilen birge kanada puqraliqigha ötken. Ötken yili u kanada pasporti bilen özbékistan'gha tughqan yoqlashqa barghinida , özbékistan da'iriliri teripidin qolgha élinip xitaygha tapshurup bérilgen idi ,xitay da'iriliri xéli mezgilgiche höseyin jélil mesilisini mexpiy tutup keldi , bu peytte höseyin jélilning xitay türmiside qattiq qiyin ‏- qistaq hem ten jazasigha uchrighanliqi melum.

Xitay saqchiliri höseyin jélilning anisigha höseyin jélilning mushu bir ay ichide bashqa türmige yötkilidighanliqini bildürgen.

Kanada Uyghur jem'iyitining re'isi memet toxti " xitay hökümitining höseyin jélilni bashqa türmige yötkeydighanliqi , höseyin jélilning qoyup bérilish mesiliside xitay hökümitining barliq qanuniy yollarni pütünley tosaydighanliqidin dérek béridu " deydu.

Nöwette , xitay hökümitining höseyin jélilning kanada puqraliq salahiyitini étrap qilmay uninggha jaza körüsh mesilisi, kanada bilen xitayning diplomatik munasiwitidiki ötkür ixtilaplarning biri bolup kelmekte. (Gülchéhre)