Xitay hüseyin jélilning qiz qérindishi bilen körüshüshige ruxset qildi


2008.01.04

Xitay da'iriliri ürümchidiki bir türmide muddetsiz qamaq jaza mudditini ötewatqan Uyghur kanada puqrasi hüseyin jélilning ötken hepte qiz qérindishi bilen körüshüshige yol qoyghan. Kanada "Globe and mail" gézitining jüme künki xewiride eskertishiche, hüseyin jélilning meryem isimlik bir qiz qérindishi uning bilen körüshüp, 20 minuttek söhbetleshken.

Xewerde kanada Uyghur jem'iyiti mes'uli memet toxtining bergen uchurigha asaslinip, körüshüsh jeryanida hüseyin jélilning börek aghriqidin shikayet qilghanliqini we türme da'iriliri bolsa uning késili bilen chatiqi bolmighanliqini ilgiri sürdi. Memet toxtining eskertishiche, hüseyin jélil yene qiz qérindishidin béyjingdiki aqlighuchi adwokatida özining 30 betlik guwahliq sözi barliqini, da'irilerning buni sot jeryanida otturigha qoydurmighanliqini, bu matériyalni adwokatining kanada elchixanisigha tapshurup bérishini telep qilghan.

Nöwette hüseyin jélil ürümchidiki bajyaxu türmiside jaza mudditini ötimekte. Kanada gézitining xewiride eskertishiche, hüseyin jélil mesilisi 2007 - yili xitay - kanada munasiwitige tamghisini urghan weqe shundaqla dunya metbu'atlirida eng köp xewer qilin'ghan dilolarning biri bolup qalghan bolsimu, lékin hüseyin jélil muddetsiz qamaq jazasigha höküm qilin'ghandin kéyin, uning mesilisi metbu'atlarda bir az pesiyip qalghanliqini bildürdi.

Xewerde yene , hüseyin jélilning ottawa hökümitidin kanadaning ontari'o ölkiside olturidighan ayali bilen téléfonda körüshüshige yardem qilishini ötün'genlikini yazdi. Özbékistan 2006 - yili hüseyin jélilni xitaygha ötküzüp bergendin kéyin, ürümchi sheherlik ottura xelq sot mehkimisi bu yil 5 - ayda uni " bölgünchilik" we" térrorchi" heriketlerge qatnishish bilen eyiblep muddetsiz qamaq jazasigha höküm qilghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.