Xitay hüseyin jélilni ölümge höküm qilghanliq xewirini inkar qildi


2006.08.09
Share on WhatsApp
Share on WhatsApp

Xitay da'iriliri charshenbe küni kanada puqrasi Uyghur hüseyinjan jélilning ölüm jazasigha höküm qilinip, yéqinda ijra qilinidighanliqi heqqide taralghan xewerni inkar qilip, xitayning téxi uni sotlap bolalmighanliqini bildürdi.

Xitay tashqi ishlar ministirliqining bir bayanatchisi charshenbe küni roytérs agéntliqining ziyaritini qobul qilghanda bu sözlerni éytqan bolup, u yene, "hüseyinjan jélil sherqiy türkistan térrochiliq heriketlirige qatnashqanliqi guman qilin'ghan xitay puqrasidur" dep bildürgen.

Bu bayanatchi aldin'ala yézip teyyarlap qoyghan bayanatnamisini mezkur agéntliqqa oqup bérip, " hüseyinjanning délosi hazir qanun boyiche bir terep qiliniwatidu. Uning üstidin téxi höküm chiqirilip bolmidi" dégen.

Buning aldida hüseyinjan jélilning Uyghur élidiki a'ile-tawabatliri xitay saqchiliridin uni uzun'gha qalmay ölüm jazasi bilen étip tashlaydighanliqi heqqidiki uchurgha ige bolghanliqini melum qilghan idi.Kanada da'irilirining bildürishiche, xitay kanadaghimu oxshashla bu xewerni inkar qilip jawap qayturghan iken.

Xitay da'iriliri hazir, ötken yili kanada puqraliqigha ötken hüseyinjan jélilning kanada puqraliqini étirap qilmaydighanliqini tekitlimekte. Xelq'ara kechürüm teshkilatining melum qilishiche, kanada hökümiti xitaydin hüseyinjan jélilgha a'it téximu köp melumat élishqa tirishqan bolsimu, lékin xitay bu heqte uchur bermey turiwalghan. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.