Америка уйғур җәмийити "торонто қуяш" гезитиниң мақалисини әйиблиди

Америка уйғур җәмийити, "торонто қуяш" гезитидә канаданиң нимә үчүн башқа дөләткә тәвә болған һөсәйин җелилға мәсул болуши керәкликини чүшәнмәк тәс, дәп мақалә язған петир вортиңтонни тәнқид қилди.

Петир вортиңтон, 31 - авғуст күни " торонто қуяш" гезитидә елан қилған мақалисида канада пуқраси һүсәйин җелилниң дөләт тәвәликини талаш - тартиш қилған вә "канада немә үчүн башқа дөләтләрдә һәрикити гуманлиқ болған канадаға тәвә әмәс бир кишигә паналиқ бериду, " дәп язған.

Америка уйғур җәмийити баянатта, петир вортиңтонниң қаришини хитайға охшаш диктатор дөләтләр тутувалған канада пуқралирини қутулдуруш вә уларниң бихәтәрлики үчүн хәтәрлик өлгә, дәп көрсәтти. Баянтта, " һәқлиқ болмиған сәвәбләр билән чәтәлдә тутуп қелинған канада пуқралирини қоғдаш канада һөкүмитиниң асаси қанундики мәҗбурийити, " дәйду.

"Бәлки вортиңтон һөсәйин җелил ата - аниси, аилиси, уруқ - туғқанлирини, дост - ярәнлирини, диний, мәдәнийити, тили, әнәниси вә ана вәтини билән мунасивитини үзгән болса, униң канада тәвәликини етирап қилған болатти, " дәп язған баянатта, лекин у "һүсәйин җелилниң нимә үчүн тинч диний паалийәтләрни дәп түрмидә ятқанлиқини, түркийигә қачқанлиқини, өзи қатнашмиған әһвал астида өлүм җазасиға һөкүм қилинғанлиқини вә ахирида канадаға келип, үмид вә әркинликкә еришкәнликини тоғра чүшүнәлмәйду, "дәп әскәртти. (Әркин)