Hüseyinjan qarim heqqidiki uchurlar rus tilidiki metbu'atlarda köplep élan qilindi

Özbékistan da'iriliri teripidin qolgha élin'ghan kanada puqrasi hüseyinjan jélil yeni Uyghurlar teripidin hüseyinjan qarim dep atalghan erbab heqqidiki uchurlar gherb metbu'atlirida élan qilinip, xelq'araliq teshkilatlarning diqqitini tartqandin kéyin, ottura asiya we rusiye metbu'atlirimu bu heqte bir qatar uchurlarni tarqatti.

Ottura asiya heqqidiki eng meshhur intérnét uchur merkezliridin biri hésablinidighan "farghana.Ru ", " sentrasi'a. Ru" qatarliq uchur torliri hüseyinjan jélil heqqide yézilghan " kanada starr" gézitining maqalisi asasida uning süriti bilen qoshup maqale élan qildi.Uningdin bashqa yene rus tilida chiqidighan "umid.Ru" we bashqa intérnét torlirimu bu heqtiki melumatlarni köchürüp basti.

Igilinishiche, perghane uchur agéntliqi we ottura asiya uchur tori ottura asiya jumhuriyetliri, rusiye hökümetliri jümlidin ottura asiyagha qiziqquchi her qaysi dölet mutexessisliri we munasiwetlik organliri eng köp köridighan tor betler bolghachqa, bu weqe ottura asiyaliqlar hem ottura asiya mutexessislirining tézdin xewer tépishigha érishken iken.

Hüseyinjan qarimgha a'it bu uchurlarda uning ilgiri Uyghurlarning musteqilliqi üchün pa'aliyet élip bardi dep eyiblinip, qirghizistan da'iriliri teripidin qolgha élin'ghanliqi, kéyin özbékistan'gha kelgenliki we uningdin kéyin türkiyige uningdin kéyin bolsa kanadagha kélip makanliship, kanada puqraliqini qobul qilghanliqi körsitilgen. (Ümidwar)