Тайланд мәликиси, уйғур елидики бир мәктәпкә пул ианә қилди


2005.04.07
Share on WhatsApp
Share on WhatsApp

Уйғур елини зиярәт қиливатқан тайланд мәликиси маха чакри сириндорин чаршәнбә күни уйғур елиниң намрат районидики бир башланғуч мәктәпкә 100 миң йүән пул ианә қилди.

Шинхуа агентлиқиниң хәвиридин мәлум болишичә, мәликә сириндорин пул ианә қилған мәктәп хотән наһийисиниң тусалла йезисида болуп, бу мәктәптә 100 дин артуқ оқуғучи оқуйдикән. Әмма хәвәрдә мәликә сириндоринниң бу пулни қәйәрдә ианә қилғанлиқи тәкитләнмигән.

Буниң алдида, "шинҗаң гезити" ниң хәвиридә, тайланд мәликиси сириндоринниң бу қетимқи сәпиридә асаслиқи уйғур елиниң хотән вилайити, кучар наһийиси вә корла шәһирини зиярәт қилидиғанлиқи көрситилгән иди.

Мәликә сириндорин хитай- тайланд дипломатик мунасивәт орнатқанлиқиниң 30 йиллиқи мунасивити билән дүшәнбә күни хитайға қаратқан зияритини башлиған. У сәйшәнбә күни башланған уйғур елидики зияритидә хитай һөкүмитиниң уйғур елиға тәйинлигән партком секритари ваң лечүән билән көрүшкән.Ваң лечүән, тайланлиқларниң уйғур аптонум районини ечиш қурулушиға қатнишишини үмид қилидиғанлиқини ипадилигән.

Бу, тайланд мәликси сриндоринниң иккинчи қетим уйғур елини зиярәт қилиши болуп, у түнҗи қетимқи сәпиридә асаслиқи уйғур елидики қәдимий будда излирини зиярәт қилған иди. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт