Xitay hökümitining Uyghur yéza éshincha emgek küchlirini sirtlargha yötkesh siyasiti tosalghugha duch kelmekte

Xitay da'iriliri Uyghur élidiki yéza éshincha emgek küchlirini sirtlargha yötkep ishqa orunlashturush siyasiti buyiche bu yil , Uyghur élining jenubidiki yéza ‏- nahiyilerdin xitay ölkilirige yötkimekchi bolghan emgek küchlirini bir milyon ikki yüz ming adem qétimgha yetküzüshni pilanlighan idi.

Shinjang gézitining 1 - awghust xewer bérishiche, xitay hökümiti mezkur pilanini ishqa ashurushta töt xil chong tosalghulargha duch kéliwatqan iken.

Xewerde , Uyghur yéziliridin emgek küchlirini xitay ölkilirige yötkesh jeryanida eng asasliq tosalghu , "bezi déhqanlarning idiyisi qalaq bolghachqa, ular tüzük kirim qilalmisimu öz yurtliridin ayrilishni xalimay jahilliq qilip, sirtqa chiqip ish izdeshke könmeydu "dep körsitilgen.

Xitay da'irilirining qarishiche , ikkinchi , Uyghur éli déhqanlirining medeniyet sapasi omumyüzlük töwen bolghachqa yuqiri téxnika telep qilidighan xizmet muhitigha maslishalmaydiken. Xitay tilini rawan sözliyelmigechke we yene sirtqi yat muhitqa maslishishchanliqi töwen bolghachqa , ular xitay ölkiliride yuqiri ma'ashliq , xizmetlerning höddisidin chiqip,kirimini yuqiri kötürüshke passip tesir körsetmekte iken.

Emeliyette Uyghur élidin radi'omizgha kelgen inkaslar shundaqla muxbirlirimizning xitay ölkilirige ishlemchilikke barghan Uyghur qizlardin igilishiche, xitay zawutlirigha yötkelgen Uyghur qizlar heqsiz mu'amililerge uchrighandin bashqa , erzan emgek heqqi bilen uzaq hem éghir emgekke sélin'ghan hem türlük xorluqqa uchrighanliq seweblik Uyghur élige qéchip kéliwatqan bolup , hetta kuchada yéqinda xitay hökümitining qizlirini xitay ölkilirige mejburiy yötkewatqanliqigha narazi bolghan Uyghur déhqanlar naraziliq namayishi ötküzgen idi.

Chet'eldiki Uyghur teshkilatliri xitay hökümitining Uyghur qizlirini xitay ölkilirige mejburiy yötkishi xitayning assimilyatsiye , milliy qirghinchiliq siyasitining bir qismi dep eyiblimekte . (Gülchéhre)