Хитай " тәңритағ әдәбият мукапати" ни тизгинләшни күчәйтти

Уйғур аптоном райони парткоми йеқинда һәр қайси област вә вилайәтләр, мәдәнийәт назарити, радио - телевизийә идариси вә әдәбият - сәнәтчиләр бирләшмисигә уқтуруш чүшүрүп, " тәңритағ әдәбият мукапати" ға талланған әсәрләрниң сияси - идийивийликигә қаттиқ өлчәм қоюшни тәләп қилди.

Аптоном районлуқ партком тәшвиқат бөлүминиң уқтурушида, бу мукапат берилидиған әсәрләр " маркисизм- ленинизм, мавзидоң идийиси, дең шявпиң нәзирийиси вә 'үчкә вәкиллик қилиш' асаси идийисини йитәкчи қилған болуши керәк, дәп тәкитлигән. Шуниң билән биргә әсәрләрни баһалаш комитетиға аптоном районниң сиртидин адәм қатнаштурушни чәклиди. Тәшвиқат бөлүми, мукапат берилидиған әсәрләр " сотсиялизмға хизмәт қилишни нишан қилған, һәммә гүлләр тәң ечилиш, һәммә қушлар бәс - бәстә сайраш принсипи бойичә асаси еқимни гәвдиләндүргән болуши керәк' дәйду.

"Тәңритағ әдәбият мукапати" аптоном район бойичә һөкүмәт даирилири тәрипидин тәсис қилинған әң юқири дәриҗилик әдәбият мукапати. Мәзкур мукапат һәр икки йилда бир қетим тарқитилиду. Бу қетимқиси мукапатниң 2 - қетим тарқитилиши болуп қалидикән. Хитай даирилири 2000 - йили уйғур аптоном раюнида идеологийә сепидики " миллий бөлгүнчиликкә қарши туруш" һәрикитини қозғиғандин кейин, бәзи миллий апторлар " миллий бөлгүнчиликкә қутратқулуқ қилди, дигән сәвәбләр билән қолға елинған.

Өткән йили маралбешилиқ язғучи нурмәмәт ясин " ява кәптәр" намлиқ әсири түпәйлидин 10 йиллиқ қамақ җазисиға һөкүм қилинди. " Қәшқәр әдибияти" жорнилиниң баш муһәррири күрәш һусәйингә 3 йиллиқ қамақ җазаси берилди. Шуниң билән биргә поскамлиқ язғучи абдулла җамал қолға елинған иди. (Әркин)