Xitay " tengritagh edebiyat mukapati" ni tizginleshni kücheytti

Uyghur aptonom rayoni partkomi yéqinda her qaysi oblast we wilayetler, medeniyet nazariti, radi'o - téléwiziye idarisi we edebiyat - sen'etchiler birleshmisige uqturush chüshürüp, " tengritagh edebiyat mukapati" gha tallan'ghan eserlerning siyasi - idiyiwiylikige qattiq ölchem qoyushni telep qildi.

Aptonom rayonluq partkom teshwiqat bölümining uqturushida, bu mukapat bérilidighan eserler " markisizm- léninizm, mawzidong idiyisi, déng shyawping neziriyisi we 'üchke wekillik qilish' asasi idiyisini yitekchi qilghan bolushi kérek, dep tekitligen. Shuning bilen birge eserlerni bahalash komitétigha aptonom rayonning sirtidin adem qatnashturushni cheklidi. Teshwiqat bölümi, mukapat bérilidighan eserler " sotsiyalizmgha xizmet qilishni nishan qilghan, hemme güller teng échilish, hemme qushlar bes - beste sayrash prinsipi boyiche asasi éqimni gewdilendürgen bolushi kérek' deydu.

"Tengritagh edebiyat mukapati" aptonom rayon boyiche hökümet da'iriliri teripidin tesis qilin'ghan eng yuqiri derijilik edebiyat mukapati. Mezkur mukapat her ikki yilda bir qétim tarqitilidu. Bu qétimqisi mukapatning 2 - qétim tarqitilishi bolup qalidiken. Xitay da'iriliri 2000 - yili Uyghur aptonom rayunida idé'ologiye sépidiki " milliy bölgünchilikke qarshi turush" herikitini qozghighandin kéyin, bezi milliy aptorlar " milliy bölgünchilikke qutratquluq qildi, digen sewebler bilen qolgha élin'ghan.

Ötken yili maralbéshiliq yazghuchi nurmemet yasin " yawa kepter" namliq esiri tüpeylidin 10 yilliq qamaq jazisigha höküm qilindi. " Qeshqer edibiyati" zhornilining bash muherriri küresh huseyin'ge 3 yilliq qamaq jazasi bérildi. Shuning bilen birge poskamliq yazghuchi abdulla jamal qolgha élin'ghan idi. (Erkin)