Uyghur élining wekilliri Uyghurlar menpe'eti üchün sözliyelemdu?

Xitay axbarat wastiliri, xitayning Uyghur aptonum rayon hökümitining memliketlik siyasiy kéngesh ezalirining, Uyghur élidiki xelqning arzu - ümidlirini merkizi xitay hökümitining yighinida kéngishishtek éghir mes'ulyetni ötüsh üchün ayrupilan'gha olturup, xitayning 10 ‏- nöwetlik komitétining 5 ‏- yighinigha qatnishish üchün ketkenlikini xewer qildi.

Xewerde, siyasiy kéngesh ezalirining béyjingge méngishtin burun, muxbirlarning ziyaritini qobul qilip, siyasiy jehette kéngishish, démokratik nazaret qilish, hakimyet ishlirigha qatnishish, hakimiyet ishliri üstide muhakime élip bérish, xelqning menpe'etige uyghun pikirlerni otturigha qoyush rolini oynaydighanliqi bildürülgen.

Biraq chet'ellerdiki Uyghur siyasetchiliri, Uyghur élidin yighin'gha qatnishish üchün barghan siyasiy kéngesh wekillirining peqet, xitay hökümitining siyasitini himaye qilish, merkizi hökümet némini qarar qilsa, shuni maqullash rolini oynaydighanliqini, mundaqche éytqanda ularning peqet qol kötürüp, awaz maqullash wezipisini öteydighanliqini bildürmekte.

Uyghurlarning meniwi anisi, dunya Uyghur qurultiyining re'isi rabiye qadir xanim, ilgiri xitay siyasiy kéngesh wekili bolup, u béyjingda ötküzülgen siyasiy kéngesh yighinlirigha köp qétim qatniship, Uyghurlarning heq - qoquqlirini yaxshilash, bolupmu Uyghurlar duch kéliwatqan ma'arip, pilanliq tughut, déhqanlarning heqsiz hashar emgeklirige sélinish ehwali, jan béqish helekchilikide ichkiri ölkilerde türlük qismetlerge duchar boliwatqan Uyghur yashlirining mesililiri, xitaylar bilen Uyghurlar otturisidiki barawersizlik qatarliq nurghunlighan mesillerni dadilliq bilen otturigha qoyup, merkizi hökümetning bu mesililerni qet'i bir terep qilishni telep qilghan.

Chet'ellerde yashawatqan Uyghurlar, rabiye qadir xanim mushu seweblik xitayning közige mix bolup qadilip, qesten türmige tashlan'ghanliqini ilgiri sürmekte. (Eqide)