Ili derya wadisini échishqa 12 milyard 900 milyon yüen ajritilghan

Xitay da'iriliri Uyghur élining ili derya wadisini échish ishliri üchün 12 milyard 900 milyon yüen meblegh ajratqan.

Tengritagh xewer torining melum qilishiche, ili derya wadisini échish bu qurulushi xitayning yer-ziminni échip retke salidighan yette chong qurulushining biri iken. Bu qurulush boyiche, ili wadisidiki yette nahiyidiki bir qisim rayonlar yéza-igilikige bap kélidighan zapas yer bayliqi qilip özgertilidiken. Shundaqla bu qurulush bu yilning kéyinki yérimida ish bashlinip, kéler yilining axirida tamamlinidiken.

Xewerde körsitilishiche yene, xitay hökümitining Uyghur élide achmaqchi boliwatqan ziminliri ili wadisidin sirt yene, Uyghur élining shimaliy we jenubidiki bir qisim tagh baghri bostanliq rayonliri iken. Xitayning döletlik zimin bayliqi ministirliqining orunlashturulishi bilen élip bérilghan bu pilanda Uyghur élidiki 6 nuqtiliq rayondiki bostanliqlar, yéza-igilik yerliri qilip échilidiken.

Emma xitayning Uyghur élide élip bériwatqan yer échish herikiti izchil köp qisim Uyghurlarning naraziliqini qozghap kelgen bolup, ular xitayning pilansiz élip bériwatqan bu qurulushining yerlik muhitqa éghir buzghunchiliq körsitipla qalmay, téximu köp xitay köchmenlirining Uyghur élige yer échishqa kélishige türtke bolidighanliqini körsetmekte. (Peride)