Chet'eldiki Uyghurlar rabiye qadirning qoyup bérilishini qarshi aldi

Uyghur kishilik hoquq pa'aliyetchisi we tijaretchisi rabiye qadirxanimning muddettin burun qoyup bérilgenlik xewiri, uning a'ile -tawabatliri we Uyghur jama'etchilikini zor xoshalliqqa chömdürdi.

Rabir qadir xanimning yoldishi sidiq haji rozi radi'omizda mexsus obzor élan qilip, amérika hökümiti, xelqi we xelq'ara kishilik hoquq teshkilatlirining rabiye qadirning qoyup bérilishi yolida körsetken tirishchanliqlirigha minnetdarliqini bildürdi. Rabiye qadirning wirjiniya shtatida turushluq qizi eqide rozi, besh yérim yil körüshmigen apisi bilen qayta didarlishidighanliqidin teswirligüsiz xoshalliqqa chömgenlikini éytti.

Dunya Uyghur qurultiyi rabiye qadir xanimning qoyup bérilishi munasiwiti bilen bayanat élan qilip, xitay hökümitining, amérika we gherb ellirining bésimi astida rabiye qadirni qoyup bergenlikini qarshi aldi.

Biraq, dunya Uyghur qurultiyining bayanatchisi dilshat rishit bayanatida, rabiye qadirning qoyup bérilishining Uyghurlarning kishilik hoquq mesilisining hel bolghanliqidin dérek bermeydighanliqini bildürdi. U gherb ellirini dawamliq türde Uyghurlarning kishilik hoquqini yaxshilash we rabiye qadirgha oxshash wijdan mehbuslirining qoyup bérilishi üchün,xitay hökümitige bésim ishlitishke chaqirdi.

Amérika hökümitining bayanatchisi sikot meklilenmu peyshenbe küni bergen bayanatida, "rabiye qadirning qoyup bérilgenlikini qarshi alimiz" dédi. Rabiye qadir mesiliside zor tirishchanliq körsetken amérikining sabiq yardemchi tashqi ishlar ministiri lorin küreynirmu radi'oyimiz muxbirining ziyaritini qubul qilghanda, rabiye qadirning qoyup bérilip, amérikigha yolgha sélin'ghanliqidin xursen bolghanliqini bildürüp, rabiye qadirning chet'elde turupmu Uyghurlargha nurghun töhpe qoshalaydighanliqini körsetti. (Arzu)