Xitay hökümiti chet'el tor betlirini ziyaret qilghan Uyghurlarni tutqun qilmaqta

Xitay hökümiti Uyghur élide intérnétke bolghan kontrolluqni kücheytip, chet'el tor betlirini ziyaret qilghan Uyghurlarni tutqun qilmaqta.

Shendong ölkisi jinen shehiride intérnétni ziyaret qiliwatqan kishiler. 80 Milyon tizimlatqan intérnét abonti bar xitay hökümiti, intérnétni kontrol qilishning künsayin qiyinlishiwatqanliqini hés qiliwatsimu, uni bashqurushni kücheytishtin toxtap qalghini yoq. AFP PHOTO/Frederic J. BROWN

Sherqiy türkistan uchur merkizining xewer qilishiche, xitayning Uyghur élidiki dölet bixeterlik idarisining xadimliri 2004 - yili 11 - ayning 2 - küni ürümchi shehiri altay yolidiki bir qoruda olturushluq abduwahip abduréhim we uning qeshqerdin kelgen méhmini tursunjan qatarliq üch kishini tutup ketken.

Saqchilar abduwahip abduréhimning öyige bésip kirgende, ular chet'eldiki Uyghurlarning tor betlirini ziyaret qiliwatqan iken. Bixeterlik xadimliri shuning bilen bir waqitta ularning kompyutérinimu élip ketken.

Sherqiy türkistan uchur merkizining bildürüshiche, buning aldida xitay hökümiti Uyghur aptonum rayonluq néfit bashqurush idarisi partkom birlik sep bölümining kadiri tahir kenjinimu tutup ketken. Xitay da'iriliri uni "sherqiy türkistan uchur merkizining uchqun gézitini tordin köchürüp, dostlirigha tarqatqan, hemde sherqiy türkistan uchur merkizige eza toplighan" digen jinayet bilen eyiblep, uninggha töt yil qamaq jazasi bergen.

Sherqiy türkistan uchur merkizi xitay hökümitining chet'el tor betlirini ziyaret qilghan Uyghurlarni tutqun qilish arqiliq, Uyghurlarning söz erkinlikini depsende qiliwatqanliqini qattiq eyiplidi.

Xitay hökümiti yéqindin buyan intérnétke bolghan kontrolluqni alahide kücheytken bolup, xewerlerge qarighanda, xitay da'iriliri, Uyghur élidiki Uyghur tilida chiqidighan 137 tor bétini her xil sewebler bilen pichetligen.(Arzu)