Хитай даирилири үрүмчидә "қаттиқ зәрбә бериш" һәрикитиниң даирисини интернеткә кеңәйтти


2007-02-16
Share

Хитай даирилири уйғур аптоном райониниң мәркизи үрүмчидә " қаттиқ зәрбә бериш" һәрикитини интәрнәт вә көчмә телефон қатарлиқ заманиви алақә саһәсигә қаритидиғанлиқини елан қилди.

Үрүмчи шәһәрлик партком сияси қанун комитетитиниң секретари лүй дешяң йеқинда үрүмчидики әдлийә органлирини мәсуллириға йиғин ечип, "тор бәтлиридики җинайи һәрикәтләр бу йилқи қаттиқ зәрбә бериш һәрикитиниң йеңи нишаниға айлинидиғанлиқини" билдүргән. У, " тор бәтлирини көзитиш, зәрбә бериш вә контролни күчәйтишни" тәкитлиди.

Лүйдешяң, " алақә қораллиридин пайдилинип елип берилидиған һәр хил җинайи һәрикәтләргә қаттиқ зәрбә бериш керәк" дәйду. Кишилик һоқуқ тәшкилатлири хитай һөкүмитиниң уйғур аптоном районида йолға қоюватқан " қаттиқ зәрбә бериш" һәрикити асаслиқи уйғурларға қаритилғанлиқини билдүрмәктә.

Кишилик һоқуқни көзитиш тәшкилати бу һәқтики бир баянтта, "қаттиқ зәрбә бериш" һәрикити уйғурларни халиғанчә тутқун қилиш, қанун тәртипләргә уйғун болмиған усулларда сотлаш, тән җазаси бериш вә өлүм җазасиға һөкүм қилиш қатарлиқ кишилик һоқуққа хилап вәқәләрниң йүз беришини кәлтүрүп чиқармақта, дәп әйиблигән. Җуңгода хитайлардин қалса, миллий тил йезиқтики тор бети әң көп милләт уйғурлар болуп һесаблиниду.

Күзәткүчиләр, " қаттиқ зәрбә бериш" һәрикитиниң нишанини тор бәтлиригә қаритиш, пикир әркинлики әслидинла хилму - хил тосалғуларға учраватқан уйғур аптоном районида кишини техиму чоңқур әндишигә салидиған һәрикәт, дәп қаримақта. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт