Дуня уйғур қурултийи баянатчиси бейҗиңдики чәтәл мухбирлири билән телефон сөһбити өткүзди

• Мухбиримиз шөһрәтниң бу һәқтики хәвири
• Download story audio

Рейтерс агентлиқиниң 17 ‏-январ бейҗиңдин хәвәр қилишичә, дуня уйғур қурултийиниң баянатчиси дилшат решит, мушу һәптиниң ахири хитайни зиярәт қилидиған әнгилийә баш министири гордон бравнни, хитай зиярити давамида , инсан һәқлири мәсилиси үстидә бейҗиңға бесим ишлитишкә чақирған. Бу һәқтә, әнгилийә һөкүмити билән, әнгилийиниң хитайда турушлуқ әлчиханисиға мәктуп йоллиған дилшат решит, бүгүн әтигән бейҗиңдики чәтәл мухбирлири билән телефон сөһбити өткүзүп, мәзкур чақириқини йәнә бир қетим тилға алған.

Дилшат решитниң билдүрүшичә, шәрқий түркистан мәсилиси хәлқаралиқ бир мәсилидур. Хитай бу мәсилини өз мәнпәәтигә уйғун һалда, бәзидә йошуруп, бәзидә ашкарилап келиватиду, әмма бастуруш һәркитини һечқачан тохтатқини йоқ. Шәрқий түркистан вәзийитини изчил көзитиш, назарәт қилиш вә арилишиш дуня дөләтлириниң һәм инсаний һәм қануний мәсулийити. Бу мәсулийәтни, бүгүн иқтисадий, сиясий вә һәрбий җәһәттин хитайға тақабил туруш қудрити болған ғәрб дуняси башламчилиқ билән үстигә елиши керәк. Дилшат ришит телефон сөһбитидә, конкерт төвәндики мәсилиләрни тилға алған:

Дилшат решт йәнә мундақ деди: инсан һәқлирини иқтисадий мәнпәәттин үстин билиш ғәрб қиммәт қаришиниң муһим бир қисми, бу йәнә, ғәрб дөләтлири тәшәббус қиливатқан, демократик түзүмниң өзигә хас алаһидилики, хәлқара террорчилиққа қарши һәрикәтниң ғайисиму, бихәтәрликни һәм инсан һәқлирини қоғдаш; шуңа, гордон бравн, хитайниң хәлқара терроризмға қарши турушта пурсәтпәрәслик қилмаслиқини тәнқид қилиши керәк.

Рейтерс агентлиқниң хәвиридә билдүрүлүшичә, баш министир гордон бравнни хитайға бесим ишлитишкә чақирған хәлқара тәшкилатлардин бири, дуня кишилик һоқуқни көзитиш җәмийити болуп бу тәшкилат чақириқида, хитайниң олимпик мунасивити билән чиқарған йеңи ахбарат бәлгилимисигә әмәл қилмайватқанлиқини нуқтилиқ мәсилә сүпитидә оттуриға қойған. Буниңдин башқа, хитайни мәшһур әйдиз паалийәтчиси хуҗияни түрмидин қоюветишкә, судан вә бермидики инсан һәқлири мәсилисиниң тәрәққиятида иҗабий рол ойнишиға , бесим ишлитишини тәләп қилған.

Дилшат риеһит мәзкур чақириқларниң үнүми һәққидә тохтилип, чақириқлиримиз һәр вақит, һәммә йәрдә тәсир көрситип кетәлмәслики мумкин, әмма нәтиҗиси немә болушидин қәтийнәзәр уйғур хәлқиниң авазини дуняға йәткүзүш бизниң мәсулийитимиз дәп билдүрди. (Шөһрәт һошур)