Келәр һәптә үрүмчидә оттура асия райони иқтисадий һәмкарлиқ программисиниң йеғини өткүзүлиду


2006-10-16
Share

Оттура асия райони иқтисадий һәмкарлиқ программисиниң 5‏- нөвәтлик министирлар йеғини келәр һәптә үрүмчидә өткүзүлмәкчи.

Хәвәрләргә қариғанда, бу йеғин җәрянида оттура асия райони иқтсадий һәмкарлиқ программисиға әза афғанистан, әзәрбәйҗан, хитай, қазақистан, қирғизистан, моңғулийә, таҗикистан вә өзбекистан қатарлиқ 8 дөләт вәкиллири һәмдә яврупа қурулуш вә тәрәққият банкиси, ислам тәрәққият банкиси, дуня банкси, б д т тәрәққият программиси қатарлиқ алтә хәлқара тәшкилатниң вәкиллири өз-ара һәмкарлиқниң даирисини техиму кеңәйтиш үчүн йеңи қарарлар қобул қилидикән.

Оттура асия райони иқтисадий һәмкарлиқ программиси 1997‏- йили паалийәт башлиған болуп, униң асаслиқ мәқсити оттура асия районида иқтисадий һәмкарлиқни күчәйтиш арқилиқ районда яшаватқан хәлқләрниң турмуш сәвийисини юқири көтүрүш вә намратлиқни азайтиш шундақла районда сода- тиҗарәт, қатнаш вә һәр түрлүк хәлқниң турмуши билән мунасивәтлик тәрәққият программилирини мәбләғ билән тәминләштин ибарәт.

Хәвәрләргә қариғанда, 5‏- нөвәтлик минситирлар йеғинида әза дөләт вә тәшкилат вәкиллири, программиниң келәрки йилларда елип баридиған паалийәтлирини ениқлап, райондики дөләтләр оттурисидики һәмкарлиқни техиму күчәйтиш мәсилисини музакирә қилидикән.

Мутәхәсссиләрниң ейтишичә, әгәр оттура асия районидики дөләтләр иқтисадий ислаһатни дегәндәк елип барса шундақла өз-ара иқтсадий һәмкарлиқини күчәйтсә, 2015 ‏- йилиға барғанда мәзкур район дөләтлиридә яшаватқан хәлқниң йиллиқ кирими икки һәссә көпийиши мумкин икән. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт