Ürümchide xitay ishlemchiler ishchilar uyushmilirigha qobul qilinmaqta

Uyghur aptonom rayonluq ishchilar bash uyushmisining re'isi "ishlemchilerge buningdin kéyin biz ige chiqimiz" dep bildürdi. Shinxu'a agéntliqining-27april ürümchidin bergen xewirige qarighanda , peyshenbe küni ürümchining bext yoli mehelle komitéti ishchilar uyushmisigha gensudin Uyghur élige yallanma ishchiliqqa kelgen, ayda sekkiz yüz yüen ma'ash alidighan bir xitay ishchi qobul qilin'ghan.

Sun jin jin isimlik bu yallanma ishchining bildürüshiche, mushu mehelle komitéti tewelikide özige oxshash ishchilar uyushmisi ezaliq kinishkisi alghan yallanma ishchilardin 180 i bar iken.

Uyghur aptonum rayonluq ishchilar uyushmisining re'isi jang jingyi bu yil biz barliq xitay ishlemchilerge eger mesilige yoluqsanglar bizni izdenglar dep murajet qilimiz. Biz ularning qanuniy hoquqini qoghdap ma'ashlirining waqtida tarqitilishigha, dawalinish, turmush, perzentlirining terbiyilinishige oxshash mesililirini hel qilishigha tirishimiz, ularni ishlitiwatqan orunlarni nazaret qilimiz . Qiyinchiliqqa yoluqqanda biz ulargha ige chiqimiz " dégen.

Buningdin bir kün burun ürümchide 200 ge yéqin xitay ishlemchi melum méhmanxanining ma'ashini waqtida bermigenlikige naraziliq bildürüp kochigha chiqip dostluq yolini tosiwélip qatnashni toxtitip qoyghan idi . Emma ularning bu herikiti saqchi yaki hökümet tereptin tosqunluqqa uchrimidi , hökümet terep ularning mesilisini choqum yaxshi bir terep qilidighanliqini bildürüp ularni tarqatqan.

Melumatta körsitilishiche, Uyghur élige yiligha kéliwatqan xitay ishlemchilerning sani ikki milyon'gha yétidiken. Nöwette ulardin ishchilar uyushmisigha qobul qilin'ghanliri 10 ke yétidiken. (Gülchéhre)