Уйғур яшлар хитай өлкилиридә, хитай мәдикарлар уйғур елидә ишқа орунлашмақта


2007-04-12
Share

Уйғур елидә мәвҗүт ишсизлиқ мәсилиси интайин еғир болуватқан бир пәйттә, хитай өлкилиридин кәлгән мәдикарларни иш пурситигә игә қилидиған сиясәт, бәлгилимиләр вә паалийәтләр йолға қоюлмақта.

12 ‏- Април күни, шинҗаң гезитидә, чөчәк шәһири тинчлиқ кочиси қурулуш райони һәмдә әмгәк капаләт понкитиниң, хитай өлкилиридин кәлгән мәдикар ишчиларға, хизмәт орунлириниң ишчи ишлитиш әһваллири шуниңдәк һөкүмәтниң мунасивәтлик сиясәт вә бәлгилимилирини тонуштуруш паалийити елип барғанлиқи һәққидики хәвәрни елан қилди.

Хитай ахбарат вастилирида берилгән хәвәрләр, шуниңдәк истансимизниң бивастә игилигән мәлуматлиридин қариғанда, нөвәттә уйғур яш қизлири, түркүм - түркүмләп хитай өлкилиригә ишқа орунлаштурулуш баһанисда йөткәп кетиливатқан болуп, гәрчә бу хитай һөкүмитиниң, ишсиз яшларни ишқа игә қилиш, кәмбәғәл деһқанларни һаллиқ сәвийигә йәткүзүшдин ибарәт ғәмхорлуқ сиясити дәп тәшвиқ қилинсиму, әмма йәнила нурғунлиған уйғурлар, буниң уйғурларни ассимилятсийә қилиш қәдимини тезлитиштики йәнә бир чарә икәнликини көрсәтмәктә.

Көзәткүчиләр, уйғур қизларниң хитай өлкилиридә игә - чақисиз қелип, яман ақивәтләргә учриғандин сирт, хитайда йүз бериватқан әр ‏- аял тәңпуңсизлиқ кризисиниң қурбаниға айлинип кетишидин әндишә қилишмақта.

Дуня уйғур қурултийи йетәкчиликидики барлиқ уйғур кишилик һоқуқ тәшкилатлири, хитай өлкилиригә елип кетиливатқан уйғур қизларға немә үчүн өз юртлиридин иш берилмәйдиғанлиқини, бәлки хитай өлкилиридин кәлгән мәдикарларға болса уйғур елидә иш қилиш пурситиниң кәң икәнликини оттуриға қоюп, уйғур елидә йүз бериватқан бу һадисиниң ашкара кеңәймичилик сиясити һесаблинидиғанлиқини вә буни дуня җамаәтчиликигә ашкарилайдиғанлиқини билдүрмәктә. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт