Уйғур илидики ислам дини мәктипи партийә мәктипигә айландурулмақта

Тәңритағ тори, 11 ‏- өктәбир күни , йеқинда уйғур районида һөкүмәт 28 ‏- қарарлиқ вәтәнпәрвәр диний затларни тәрбийиләш курси ачқанлиқи һәққидә хәвәр бәрди. Хәвәрдә билдүрүлгән мәлуматларға асасланғанда, шинҗаң ислам дини мәктипи дәп аталған бир мәктәп партийә мәктипигә айланған.

Мәзкур курста сөз қилған ,шинҗаң ислам дини мәктипиниң мудири, мәктәпниң дәрслик программилириниң пүтүнләй қаратмилиқи барлиқини ашкарилиған. Мудир, мәктәпниң дәрслик программилирини тонуштуруп мундақ дегән: өгитилидиған дәрсләр партийиниң 16 ‏-қурултийиниң роһи, партийиниң милләтләр вә дин сиясити, шинҗаңниң иқтисад вә пән-техника тәрәққияти , аптоном районниң 50 йилдин буянқи омуми тәрәққияти , җуңхуа хәлқ җумһурийитиниң асасий қануни, шинҗаңниң тарихи вә тәрәққияти тоғрисидики ақ ташлиқ китабтин ибарәт .

Мудир юқириқи мәзмунда дәрс өтүлүштин башқа, давамлиқ һалда, бөлгүнчиликкә, террорлуққа, диний әсәбийликкә қарши сүрәт, көргәзмә вә кино филимлирини көрүшкә тәшкилләйдиғанлиқини билдүргән.

Мудирниң тонуштуришида, нами шинҗаң ислам мәктипи дәп аталған бу мәктәпниң дәрс программисида ислам диниға мунасивәтлик һечқандақ мәзмун йоқ. Мудир, мәктәпниң курсантларни тәрбийиләш мәқситиниң , диний затларға партийә вә һөкүмәт алдидики мәҗбурийитини һес қилдуруш икәнликини билдүргән. Мудир йәнә мәктәпниң, 2001 ‏- йилдин башлап диний затлардин 5200 нәпирини партийигә вә сотсиялизмға садиқ аңда йетиштүрүп чиққанлиқини билдүргән.

Хәлқара кишилик һоқуқ тәшкилатлири, йиллардин бери хитайниң уйғурлар устидин йүргүзүватқан диний зулумини йошуруш үчүн һәр хил сахта тәшвиқат елип бериватқанлиқини әйиблигән иди. юқириқи мәктәп, бу әйибләшләрниң тоғрилиқини пакит билән тәминләйду. (Әқидә)