Uyghur ilidiki islam dini mektipi partiye mektipige aylandurulmaqta

Tengritagh tori, 11 ‏- öktebir küni , yéqinda Uyghur rayonida hökümet 28 ‏- qararliq wetenperwer diniy zatlarni terbiyilesh kursi achqanliqi heqqide xewer berdi. Xewerde bildürülgen melumatlargha asaslan'ghanda, shinjang islam dini mektipi dep atalghan bir mektep partiye mektipige aylan'ghan.

Mezkur kursta söz qilghan ,shinjang islam dini mektipining mudiri, mektepning derslik programmilirining pütünley qaratmiliqi barliqini ashkarilighan. Mudir, mektepning derslik programmilirini tonushturup mundaq dégen: ögitilidighan dersler partiyining 16 ‏-qurultiyining rohi, partiyining milletler we din siyasiti, shinjangning iqtisad we pen-téxnika tereqqiyati , aptonom rayonning 50 yildin buyanqi omumi tereqqiyati , jungxu'a xelq jumhuriyitining asasiy qanuni, shinjangning tarixi we tereqqiyati toghrisidiki aq tashliq kitabtin ibaret .

Mudir yuqiriqi mezmunda ders ötülüshtin bashqa, dawamliq halda, bölgünchilikke, térrorluqqa, diniy esebiylikke qarshi süret, körgezme we kino filimlirini körüshke teshkilleydighanliqini bildürgen.

Mudirning tonushturishida, nami shinjang islam mektipi dep atalghan bu mektepning ders programmisida islam dinigha munasiwetlik héchqandaq mezmun yoq. Mudir, mektepning kursantlarni terbiyilesh meqsitining , diniy zatlargha partiye we hökümet aldidiki mejburiyitini hés qildurush ikenlikini bildürgen. Mudir yene mektepning, 2001 ‏- yildin bashlap diniy zatlardin 5200 nepirini partiyige we sotsiyalizmgha sadiq angda yétishtürüp chiqqanliqini bildürgen.

Xelq'ara kishilik hoquq teshkilatliri, yillardin béri xitayning Uyghurlar ustidin yürgüzüwatqan diniy zulumini yoshurush üchün her xil saxta teshwiqat élip bériwatqanliqini eyibligen idi. Yuqiriqi mektep, bu eyibleshlerning toghriliqini pakit bilen teminleydu. (Eqide)