Исмайил тиливалди нурмуһәммәт ясин қатарлиқ икки уйғур язғучиниң қолға елинғанлиқини етирап қилди

Уйғур аптоном райони қурулғанлиқиниң 50 йиллиқи мунасивити билән пәйшәнбә күни бейҗиңда өткүзүлгән ахбарат елан қилиш йиғинида, уйғур аптоном райониниң рәиси исмайил тиливалди, нурмуһәммәт ясин қатарлиқ икки уйғур язғучиниң қолға елинғанлиқини етирап қилди.

Исмайил тиливалди йиғинда, хоңкоңдики "венхуй гезити" мухбириниң язғучиларни қолға елиш хәвириниң растлиқи тоғрисида сориған соалиға җаваб берип, өзлириниң һәқиқәтән бу икки язғучини қолға алғанлиқини, шундақла буниңдәк шеир яки повест йезиш усули билән бөлгүнчилик қилидиған вә милләтләрниң иттипақлиқиға бузғунчилиқ қилидиған һәрикәтләрниң хитайда қануний йол билән җазаға тартилидиғанлиқини әскәртти.

Исмайил тиливалди сөзидә йәнә, бундақ кишиләрниң уйғур елидә көп санни игилимәйдиғанлиқини, һазир бундақ кишиләргә һәр милләт хәлқиниң ортақ қарши туридиғанлиқини,шундақла уларға кишиләр кочида қалған чашқанни урғандәк, көргәнла йәрдә қарши туридиғанлиқини билдүрди .

Уйғур шаири вә язғучи нурмуһәммәт ясин, "қәшқәр әдәбияти" жорнилиниң 5 - санида "ява кәптәр" намлиқ әсирини елан қилғандин кейин, хитай һөкүмити бу әсәргә "бөлгүнчилик" идийиси сиңгән дәп әйибләп, аптор нурмуһәммәт ясинни 10 йиллиқ қамақ җазасиға һөкүм қилған иди. Бу әсәр йеқинда, "әркин асия радиоси" тәрипидин хитай вә енглиз тиллириға тәрҗимә қилинди. (Пәридә)