Ismayil tiliwaldi: yawayi Uyghurlar ichide yaxshi ademler köpiyiwatidu

Uyghur aptonom rayonining re'isi ismayil tiliwaldi, jüme küni "junggo hökümiti tor béti" de xitay tordashlirining su'aligha jawab bérip, bir xitay puqrasining kishiler shinjangliqlarni yawayi we namrat, dep qaraydu, dégen sözige yaxshi kishiler köpeydi, yaman kishiler azaymaqta, dep jawab berdi.

Ismayil tiliwaldi bu sözlerni jüme küni xitay tordashlirining Uyghur aptonom rayoni heqqidiki su'allirigha jawab bergende, bir xitay tordashning kishiler shinjangliqlarni nahayiti yawayi we namrat, dep qaraydu, shinjangning muhitini qoghdash we qumluqni tizginlesh mesiliside pilaningiz barmu ? digen su'aligha qayturghan jawabida tekitlidi.

Gerche bu xitayning su'ali muhit we qumluqni tizginlesh pilani heqqide bolsimu, emma u Uyghurlarning yawayiliqini qisturup ötüshni untumighan. Tiliwaldi, bu xitayning muhit heqqidiki su'aligha jawab bermigen. Lékin " yawayi" Uyghurlarni chüshendürüp, " esli nurghun kishiler yénida pichaq élip yüretti. Ayallar yénidin yirtilghan yerlirini yamaydighan yingne- yip ayrimaytti" deydu. U, pichaq asidighanlarning aziyishini yaxshi kishiler köpeymekte, dep ima qilghan. Tiliwaldi, " her qaysi millet xelqining jelp qilish küchi ashmaqta. Yaxshi kishiler köpeydi, yaman kishiler azaymaqta," deydu. (Erkin)