Rabiye qadir xanim xitayning adem etkeschiliki heqqide ispat béridu


2007.10.30

Gerche 2008 - yilliq béyjing olimpik yighini yéqinlap kéliwatqan bolsimu, xelq'ara jem'iyetning közitishiche, xitayning kishilik hoqoq xatiriside yaxshilinish körülmidi.

Xitayda mewjut boluwatqan ayal we balilarni aldap sétishtek mesile bolsa xitaydiki eng éghir insan heqliri mesilisining biri. Xitayning insan heqliri mesilisini yéqindin közitip kéliwatqan amérika dölet mejlisi kishilik hoqoqi komitéti 31 - öktebir küni xitaydiki ayal we balilarni sétish mesilisi heqqide ispat anglash yighini ötküzmekchi.

Charshenbe küni chüshtin washin'gtonda ötküzülidighan mezkür ispat anglash yighinida Uyghur milliy herikiti yétekchisi rabiye qadir xanim xitaydiki adem etkeschilik mesilisi yeni Uyghurlarningmu bu xil sodining qurbani ikenliki heqqide muhim ispat bermekchi.

Amérika dölet mejlisining 2007 - yilidiki adem sodisi mesilisi heqqidiki doklatida körsitilishiche, xitay hökümitining xitay ichide adem sodisigha zerbe bérish yeni ayallar hem balilarning insaniy hoquqini qoghdash jehette héchbir jiddiy, ünümlük tedbir almighanliqi seweblik mezkür mesile xitaydiki éghir bir mesile bolupla qalmay, xitaydiki adem sodigerlirining qanunsiz heriketliri etraptiki bashqa qoshna döletlergiche kéngeymekte.

Xitaydiki adem sodisida bolupmu balilarni hem ayallarni jinsiy mulazimetke mejburlash alahide éghir mesile. Xelq'ara emgekchiler teshkilatining statistika qilishiche, xitayda her yili 10mingdin 20 mingghiche adem sétilidu shundaqla ularning %90 ini ayallar hem balilar igileydu. Amérika dölet mejlisi kishilik hoqoq komitétida ötküzülidighan mezkür ispat anglash yighinida rabiye qadir xanimdin bashqa, amérika tashqi ishlar ministirliqi adem etkeschilikini közitish we qarshi turush komitéti mes'uli mark.P logan, amérika kishilik hoquqni közitish teshkilati bashliqi tom malinowski qatarliqlarmu muhim doklatlarni béridu. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.