Qeshqer yéngisheher nahiyisining bir emeldari 13 yilliq késildi

Ürümchi sheherlik ottura sot mehkimisi seyshenbe küni qeshqer yéngisheher nahiyilik hökümet emeldari jawni para élish jinayiti bilen eyiblep, 13 yilliq qamaq jazasigha höküm qildi hemde ikki yilliq siyasiy hoquqini élip tashlap, 100 ming yü'en bisatini musadire qilishqa buyridi.

"Ürümchi kechlik géziti" ning xewiridin ashkarilinishiche, yéngsheher nahiyilik hökümetning ürümchide turushliq bashqarmisining mudiri we kadirlar sanatoriyisining bashliqi jaw 2003 - yilidin 2005 - yilighiche, hoquqidin paydilinip, 350 ming yü'en para yigen. U asasliqi kadirlar sanatoriyisidiki qurulushlarni kötirige bérish jeryanida, qurulush shirketlirining parisini qobul qilghan.

Xitay teptish da'iriliri bu yil 4 - ayda uning turalghu jayi we ishxanisini tekshürgende, jem'iy bir milyon 780 ming yü'endin artuq bisati barliqini bayqighan. U qanunluq kirimi we para alghan 350 ming yü'endin sirt bir milyon 200 minggha yéqin pulning kélish menbesini chüshendürmigen.

Xewerde éytilishiche, sotta jaw bu pullarning köp qismining qanunluq ikenlikide ching turghan. Jaw sottin kéyin, dawamliq yuqiri derijilik sot mehkimilirige erz sunidighanliqini bildürgen.

Xitay hökümet emeldarliridiki chiriklik ehwalliri intayin éghir bolup, xitay hökümiti gerche chiriklikni yoqutushqa tirishidighanliqini bildüriwatqan bolsimu, emma nurghun mutexessisler, xitaydiki bir partiye déktaturliqidiki siyasiy tüzülmining chiriklikni keltürüp chiqiriwatqan asasliq amil ikenlikini bildürmekte.

Ularning qarishiche, hökümetni musteqil nazaret qilalaydighan bir tüzülme ornutulmighiche, xitay da'irilirining bir qanche chirik emeldarni jazalishi bilen chiriklik ehwallirini yaxshilighili bolmaydiken. (Arzu)