92 نەپەر ئوقۇغۇچىنى ب تىپلىق جىگەر كېسىلى سەۋەبىدىن مەكتەپتىن توختاتتى


2005-11-16
Share

شىنجاڭ ئۇنىۋېرسىتېتى بۇ يىل يېڭى ئوقۇشقا كىرگەنلەرنىڭ ئارىسىدا 92 نەپەر ئوقۇغۇچىنى، ب تىپلىق جىگەر كېسىلىگە گىرىپتار بولغانلىقى ئۈچۈن بىر يىل مەكتەپتىن توختاتقان.

خىتاي خەۋەر ئاگېنتلىقىنىڭ مەلۇم قىلىشىچە، بۇ ئوقۇغۇچىلار ھازىر يۇرتلىرىغا قايتىش ئالدىدا تۇرغان بولۇپ، ئۇلارنىڭ ئوقۇشقا كىرىش سالاھىيىتى بىر يىل ساقلىنىدىكەن. بۇ بىر يىل ئىچىدە ئۇلارنىڭ كېسىلى ساقىيىپ، تەكشۈرۈشتىن ئۆتسە، ئۇلار مەكتەپكە قايتا ئوقۇشقا كىرسە بولىدىكەن. ئەگەر ئۇلارنىڭ كېسىلى يەنىلا ساقايمىسا، ئۇ چاغدا ئۇلارنىڭ ئوقۇشقا كىرىش سالاھىيىتى پۈتۈنلەي ئېلىپ تاشلىنىدىكەن.

خەۋەردىن مەلۇم بولۇشىچە، ئادەتتە شىنجاڭ ئۇنىۋېرسىتېتىدا ئوقۇغۇچىلارنى مۇشۇ سەۋەبتىن مەكتەپتىن توختىتىدىغان ئەھۋال بار بولسىمۇ، لېكىن بۇ يىل توختىتىلغان ئوقۇغۇچىلارنىڭ سانى ئەڭ كۆپ بولغان بىر يىل ئىكەن. شۇنداقلا ئىلگىرىكى خاتىرىلەرگە ئاساسلانغاندا، ئوقۇغۇچىلارنىڭ بىر يىل ئىچىدە بۇ كېسەلدىن تەلتۆكۈس ساقىيىشى تەسكە چۈشىدىكەن.

لېكىن، خەۋەردە بۇ ئوقۇغۇچىلار ۋە ئۇلارنىڭ مىللىتى توغرىسىدا تەپسىلىي مەلۇمات بېرىلمىگەن. گەرچە ئوقۇغۇچىلار ۋە بىر قىسىم زىيالىيلار مەكتەپنىڭ بۇ قارارىدىن نارازى بولسىمۇ، لېكىن شىنجاڭ ئۇنىۋېرسىتېتى مەكتەپتىكى قالغان 35 مىڭ ئوقۇغۇچىنىڭ سالامەتلىكىنى نەزەردە تۇتقاندا، بۇ قارارنىڭ توغرا چىقىرىلغانلىقىنى تەكىتلىگەن. (پەرىدە)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت