Җигәр яллуғи сәвәбидин аилисигә қайтурулған оқуғучилар үчүн икки миң кишилик имза топланди


2006.12.29

Хитай бойичә 2000 дин артуқ киши вә аммиви тәшкилатлар пәйшәнбә күни уйғур аптоном райониниң мәркизи үрүмчидә бу йил 9 - айда җигәр яллуғи кесәллики сәвәбидин аилисигә қайтуруветилгән 19 нәпәр оқуғучиниң мәсилисигә көңүл бөлүш тоғрисида сәһийә министирликигә бирләшмә имзалиқ хәт йезип, сәһийә министирликиниң бу вәқәни ениқлишини вә айдиңлаштуруп беришини тәләп қилди.

Хитай чоң қурурлиқидики йи ренпиң учур мулазимәт орниниң ашкарилишичә, хитайниң мәмликәт ичидики бәзи аммиви тәшкилатлар, шәхсләр вә тор бәтлири сәһийә министирликини юқириқи 19 нәпәр оқуғучиға мунасивәтлик тиббий мәсилиләр үстидә тәкшүрүш елип бериш вә бу оқуғучиларниң кесили тоғрисида илмий чүшәнчә беришни тәләп қилған.

Бирләшмә имзалиқ хәттә, уйғур аптоном райони даирилирини ахбарат елан қилиш йиғини чақирип, б типлиқ җигәр яллуғи вә оқуғучиларниң кесили тоғрисида илмий болмиған хата мәлумат бериш, үрүмчи шәһәрлик маарип идарисиниң кесәл оқуғучиларни мәктәптин қайтуруш қарариға қарши турған үрүмчидики" қар ләйлиси" тәшкилатини тақиветиш билән әйиблигән.

Бирләшмә имзалиқ хәткә 2150 киши қол қойғандин сирт, йәнә бәзи аммиви тәшкилатларниң қоллишиға еришкән. Улар уйғур аптоном райони даирилирини 19 нәпәр оқуғучиниң кесилини баһанә қилип, уларниң тәлим - тәрбийә елиш һоқуқини дәхли - тәруз йәткүзди, дәп әйиплимәктә. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.