Ürümchide jinayet sadir qilghan bulangchi ma xenching qolgha élindi

Ürümchide 3 qétim bulangchiliq qilip bir kishining ölüshi we 3 ining yarilinishini keltürüp chiqarghan bulangchi maxenching xitayning senya dégen yéride qolgha élin'ghan.

Wuxen kechlik gézitining xewirige qarighanda, maxenching wuxen we ürümchilerde arqa-arqidin bulangchiliq jinayetlirini sadir qilghan kishi bolup, jama'et xewpsizlik idariliri hetta uning üstidin 200 milyon yüenlik tutush mukapati chiqarghan iken.

Maxenching saqchilarning soraqqa tartishi bilen jinayitini iqrar qilghan bolup, u ürümchi shehiride, -1998 yili 11 - ayda, 2002 - yili 6 - ayda we 2004 - yili 10 - ayning 29 - küni arqa-arqidin bulangchiliq jinayitini sadir qilip, jem'iy 170 ming yüen bulighan we bir kishini étip öltürüp 3 ini yarilandurghan.

Gerche xewerde bulangchiliqning ürümchi shehirining qandaq yéride yüz bergenliki tepsiliy yézilmisimu, lékin bir hepte ilgiri radi'omizning heqsiz liniyisige téléfon qilghan bir yash ürümchi shehirining Uyghur sodigerliri toplashqan biyenjang soda bazirida yéqinqi yillardin buyan bulangchiliq heriketlirining köp yüz bergenlikini hemde Uyghur sodigerlirining oqqa tutulghanliqini xewer qilghan idi.

Xewerde körsitilishiche yene, wuxenlik maxenching jinayitini iqrar qilghanda, özining ilgiri biyenjang soda bazirida chong bulangchiliq délosini sadir qilghan birinchi derijilik bulangchi we qatil beybawshenning filimini körüp shuningdin ilhamlan'ghanliqini, hemde filimde körsitilgendek shinjangda pul köp oxshaydu dep bu rayonni tallighanliqini melum qilghan.(Peride)