Gollandiye we awstraliyidiki Uyghurlar sherqiy türkistan jumhuriyet künini daghdughiliq tebriklidi

1933 - Yili qeshqerde we 1944 - yili ghuljida oxshashla 12 - noyabir künliri qurulghan sherqiy türkistan jumhuriyetlirini, dunyaning her qaysi jayliridiki Uyghurlar tarixiy dölet bayrimi süpitide türlük shekillerde tebriklep kelmekte.

Gollandiye we awstraliyide yashawatqan Uyghurlarmu bu yilqi sherqiy türkistan jumhuriyet küni xatirilesh pa'aliyiti élip bardi.

11 - Noyabir gollandiyining tilburg shehiride ötküzülgen ikki jumhuriyetni xatirilesh pa'aliyiti jumhuriyet marshi bilen bashlandi, pa'aliyetke qatnashqan Uyghur hemde türkler qolini meydisige qoyup jumhuriyet üchün qan kechken jengchiler hemde sherqiy türkistan musteqilliq herikiti üchün qurban bolghan shéhitlerge hörmet bildürdi, ularning rohigha atap qur'an tilawet qildi. Jumhuriyetlerge a'it süretler körgezme qilinip nutuqlar sözlendi, axirida Uyghur milliy herikitining rehbiri rabiye xanimning Uyghurlargha sun'ghan murajiti oqup ötüldi, Uyghur wetendashlar zor alqish yangritip qollishini ipadilidi. Bu bir künni hemme birdek bayram tenteniside ötküzgen.

Gollandiyide yene , shu künidin étibaren Uyghur balilarni terbiyilesh mektipi resmiy ders bashlidi.

Awstraliyidiki Uyghurlar ikki jumhuriyetni xatirilesh pa'aliyitini awstraliye sherqiy türkistan jem'iyitining orunlashturushi bilen 10 - noyabir adileyd shehiridiki éldér baghchisida ötküzgen bolup, milliy kiyimlirini kiyiwalghan ikki yüzge yéqin Uyghurlar istiqlal marshini jarangliq halda birlikte yangritip baghchini zil ‏- zilige salghan shundaqla köpligen Uyghurlar közlirige hayajan bilen yash alghan. Pa'aliyet dawamida jama'et oxshashla, shéhidler üchün du'a tilawet qilghandin bashqa jumhuriyet tarixi hem ehmiyiti heqqide ilmiy muhakimiler qatnashturghan.

Uyghur élining tarixi hem haziri chüshendürülgen söretlik élanlar, mezilik Uyghur ta'amliri baghcha ichidiki yerlik amminimu jelp qilghan bolup, Uyghurlarning dölet bayrimini ularmu bille tebrikliship, pütün baghcha daghdughiliq bayram shadliqigha chömgen. (Gülchéhre)