Һөкүмәт әмәлдарлириниң көмүр канлириға салған мәблиғини қайтурувелиш муддитини кечиктүрди

Уйғур аптоном районида даириләр, партийә вә һөкүмәт әмәлдарлириниң 22 - сентәбиргичә көмүр канлириға салған мәбләғ вә пай чекини қайтурувелиш уқтурушиға һечким әмәл қилмиғандин кейин, мәбләғни қайтурувелиш муддитини 10 - айниң 22 - күнигичә кечиктүргән.

"Тәңритағ" ториниң хәвәр қилишичә, хитай дөләт кабинти һөкүмәт әмәлдарлиридин 22 - сентәбиргичә көмүр канлириға салған мәблиғини қайтурувелиш тоғрисида уқтуруш чиқарғандин бери, уйғур аптоном районида һазирға қәдәр мәблиғини қайтуривалған бирму әмәлдар чиқмиған.

Аптоном районлуқ көмүр канлириниң бихәтәрликини назарәт қилиш идариси, даириләрниң аптоном район бойичә тәкшүрәш һәрикитини башлиғанлиқини билдүрди. Мәзкур органниң тәкитлишичә, "әмәлдарлар билән көмүр канлар тил бириктүрүш" вәқәсиниң икки хил шәкли бар икән. Бири партийә, һөкүмәт вә қанун органлиридики әмәлдарлар көмүр канлириниң пай чекини сетивелип, мәнпәәт гуруһини шәкилләндүрүш, иккинчиси пай чекини пара орнида қобул қилиш қатарлиқлар.

" Тәңритағ" тор бетиниң ашкарилишичә, фукаң наһийисидики шинлоң көмүр кениниң пай чекини сетивалған һөкүмәт әмәлдарлири 187 гә йетидиғанлиқини елан қилди. Мәзкур канда бу йил 8 - айда йүз бәргән газ партлаш вәқәсидә 83 адәм өлгән. (Әркин)