Hökümet emeldarlirining kömür kanlirigha salghan meblighini qayturuwélish mudditini kéchiktürdi

Uyghur aptonom rayonida da'iriler, partiye we hökümet emeldarlirining 22 - séntebirgiche kömür kanlirigha salghan meblegh we pay chékini qayturuwélish uqturushigha héchkim emel qilmighandin kéyin, mebleghni qayturuwélish mudditini 10 - ayning 22 - künigiche kéchiktürgen.

"Tengritagh" torining xewer qilishiche, xitay dölet kabinti hökümet emeldarliridin 22 - séntebirgiche kömür kanlirigha salghan meblighini qayturuwélish toghrisida uqturush chiqarghandin béri, Uyghur aptonom rayonida hazirgha qeder meblighini qayturiwalghan birmu emeldar chiqmighan.

Aptonom rayonluq kömür kanlirining bixeterlikini nazaret qilish idarisi, da'irilerning aptonom rayon boyiche tekshüresh herikitini bashlighanliqini bildürdi. Mezkur organning tekitlishiche, "emeldarlar bilen kömür kanlar til biriktürüsh" weqesining ikki xil shekli bar iken. Biri partiye, hökümet we qanun organliridiki emeldarlar kömür kanlirining pay chékini sétiwélip, menpe'et guruhini shekillendürüsh, ikkinchisi pay chékini para ornida qobul qilish qatarliqlar.

" Tengritagh" tor bétining ashkarilishiche, fukang nahiyisidiki shinlong kömür kénining pay chékini sétiwalghan hökümet emeldarliri 187 ge yétidighanliqini élan qildi. Mezkur kanda bu yil 8 - ayda yüz bergen gaz partlash weqeside 83 adem ölgen. (Erkin)