Уйғур райони партком һөкүмәт әмәлдарлириниң канлардики пайлирини қайтурувелишни рәт қиливатқанлиқини инкар қилди

Уйғур аптонум районлуқ партком интизам тәкшүрүш комитети җүмә күни баянат елан қилип, һөкүмәт әмәлдарлириниң көмүр канлардики пай чәклирини қайтурувелишни рәт қиливатқанлиқи һәққидики хәвәрләрни инкар қилди.

Хитай һөкүмити, хитайда әвҗ алған "әмәлдарлар вә көмүр канлар тил бириктүрүш" әһваллиригә хатимә бериш үчүн, көмүр канға мәбләғ салған һөкүмәт әмәлдарлирини 22 - сентәбиргичә пайчекини сетиветиш тоғрисида уқтуруш чүшүргән иди. Бу, канларниң бихәтәрликини яхшилашниң бир тәдбири дәп қаралған.

Әмма ингилиз тилида чиқидиған "җуңго гезити" вә уйғур аптонум районлуқ һөкүмәткә қарашлиқ "тәңритағ тор бети" қатарлиқ мәтбуатлар өткән айда, бир қисим һөкүмәт әмәлдарлириниң вәзиписидин елинип ташлинишқа разики, пай чекини сетиветишқа рази әмәсликини хәвәр қилған.

Тәңритағ тор бети өткән җүмә күни елан қилған хәвиридә йәнә, һөкүмәт әмәлдарлириниң көмүр канлириға салған мәбләғ вә пай чекини қайтурувелиш уқтурушиниң иҗра қилиниш әһвали яхши болмиғанлиқтин, мәбләғни қайтурувелиш муддитини 22 - өктәбиргичә кечиктүргәнликини билдүргән иди. Хәвәрдин ашкарилинишичә, уйғур раюниға мәблиғини қайтуривалидиған бирму әмәлдар чиқмиған.

Уйғур аптонум районлуқ партком интизам тәкшүрүш комитетиниң билдүрүшичә, бу хәвәрләр җәмийәттә начар тәсирләрни пәйда қилғачқа, улар баянат елан қилип қилип, хитай мәркизи һөкүмәтниң оқтурушиниң вақит, тәртип җәһәттин оңушлуқ һалда елип бериливатқанлиқини көрсәткән икән. Улар йәнә бу хил "ойдурма" хәвәрләрни елан қилип, яман ақивәтләрни кәлтүрүп чиқарған мухбирларниң мәсолийини сүрүштирә қилиш һоқуқини сақлап қалидиғанлиқини тәкитлигән. Әмма интизам тәкшүрүш комитети уйғур аптунум раюнлуқ һөкүмәтниң нимә үчүн кадирларниң пай чәклирини қайтурувелиш муддитини 22 - сентәбирдин 22 - өктәбиргичә узартқанлиқи һәққидә һечқандақ чүшәндүрүш бәрмигән.

"Әмәлдар билән көмүр канларниң тил бириктүрүш" әһвали, хитайда бихәтәрлики начар көмүр канларниң давамлиқ ишләпчиқириш билән шуғуллинип, кан вәқәлириниң көп йүз беришиниң асаслиқ сәвәблириниң бири дәп қаралмақта. Хитай мәтбуатлириниң хәвиридин ашкарилинишичә, бу йил 8 - айда 83 адәмниң өлүш вәқәси келип чиққан фукаң наһийисидики шинлоң көмүр кениниң пай чекини сетивалған әмәлдарларниң сани 187 гә йетиду. (Арзу)