Шихудики көмүр канда партлаш йүз берип, 16 ишчи кан астида қалди


2005-10-27
Share

Уйғур елиниң шиху шәһридики җуңшин көмүр кенида пәйшәнбә күни чүштин кейин газ партлаш вәқәси йүз берип, кан астида мәшғулат елип бериватқан 16 ишчи қамилип қалди.

Шинхуа агентлиқиниң хәвиридә ейтилишичә, уйғур аптунум раюнлуқ кан бихәтәрликини назарәт қилиш идарисиниң қутқузғучи хадимлири дәрһал нәқ мәйданға йүрүп кәткән. Вәқәниң йүз бериш сәвәби вә кан астида қамилип қалғанларниң һаят- маматлиқи һәққидә техи мәлумат йоқ.

Хитайда, җүмлидин уйғур елидә канларниң бихәтәрлики интайин начар һисаблиниду. Тәнқидчиләр, алақидар даириләрниң пайда үчүн кишиләрниң һаятини қурбан қиливатқанлиқини билдүрмәктә.

Бу арида, хитай даирилири уйғур елиниң фукаң шәһиридики шинлуң кенида бу йил 7 - айда йүз бәргән алаһидә чоң кан вәқәсигә четишлиқ 7 кишини қолға елиш буйруқи чүшүрүлгәнликини хәвәр қилди.

Хитай хәлқ гезитиниң билдүришичә, фукаң шәһириниң ишләпчиқириш бихәтәрликигә мәсол муавин шәһәр башлиқи бу қетимқи вәқәгә четишлиқ чиққан. У мәзкур көмүр канидин пара йигән һәмдә башқиларниң нами билән канниң көмүр тошуш тиҗаритигә қатнашқан. Униң билән биллә қолға елиниш буйруқи чүшүрүлгәнләр ичидә мәзкур канниң хоҗайини, башқуручиси, техника хадимлири бар икән. Шинлоң көмүр канида 11 - ийол йүз бәргән газ партлаш вәқәсидә 83 адәм өлүп, төт адәм яриланған. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт