Uyghur aptonom rayonida kan weqesi yüz berdi


2006-05-26
Share

Uyghur aptonom rayonining pichan nahiyisidiki bir kömür kénida peyshenbe küni zeherlik gaz chiqip kétish weqesi yüz bérip hazirghiche 8 adem öldi. Bu tragidiye xitayning jan'gha zamin we qalaymiqanchiliqqa tolghan kömürchilik sana'itige bérilgen yene bir qétimliq zerbe boldi.

Xitay axbarat agéntliqining xewer qilishiche, kanchilar peyshenbe küni etigende kan astida yüz bergen partlashtin kélip chiqqan zeherlik gazda tunjuqup qalghan. Weqe yüz bérishtin burun kan astida sénik birikmilirini parchilash üchün partlitish élip bérilghan we partlitishtin 2 sa'et kéyin kan astidiki zeherlik gaz tarqalmay turupla ishchilar kan astigha chüshürülgen.

Junggoda kömür kanlarning ishlepchiqirishni qoghlushup bixeterlikke sel qarash weqeliri zor kölemdiki ölüm - yitim hadisilirini keltürüp chiqarmaqta. Xitayda kan ishchiliri köpinche yéza - qishlaqlardin kelgen tejiribisiz dihqanlarni asas qilghan. Téxi yéqindila xitayning shenshi ölkiside kan astini su bésip kétish weqesi yüz bérip az digende 57 adem ölgen we iz - déreksiz yoqalghan idi.

Birleshme axbarat agéntliqining xewerqilishiche, pichandiki kömür kanda yüz bergen weqede qutquzush xizmiti dawam qilmaqta. Lékin hazirghiche weqede iz déreksiz yoqalghanlar bayqalmighan. Bu weqe yüz bérip bir kün kéyin jüme küni xitay hökümiti memliket boyiche kichik tiptiki 21000 kömür kanning 11000 ini qisqartilidighanliqini jakarlidi. Xitay hökümiti 2005 - yili kichik tiptiki xeterlik kömür kanlarni taqash toghrisida uqturush chüshürgen bolsimu, lékin Uyghur aptonom rayoni 2005 we 2006 - yilning qish pesili yéqilghu yétishmeslik sewebidin kichik tiptiki kömür kanlarni taqimighan. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet