Ghulja nahiyiside yüz bergen kömür kan hadisiside kan igisining mes'uliyiti sürüshte qilinmidi

Yéqinda ghulja nahiyisidiki bir kömür kanda hadise yüz bérip, kan quduqi astidiki 3 neper kan ishchisi neq meydanda ölgen.

Xitay xewer wastilirining bu heqte bergen xewiridin ashkarilinishiche, xéylongjangliq bir xitay sodiger meblegh sélip özgertken kan quduqi astida qoghdighuchi tirek mu'essesi toshuwatqan kan mashinisi kan ichige 15 métir ichkirilep kirgende polat arqan üzülüp kétip, mashina üstidiki 3 tonna éghirliqtiki qoghdighuchi tirek mu'essesiliri sérilip chüshüp, sherqiy shimalliq 3 neper ishchi neq meydanda qaza qilghan.

Gerche, mezkur kanda yüz bergen hadise kan bixeterlikini bashqurush tedbirlirining puxta élip bérilmighanliqidin meydan'gha kelgenliki éniq bolsimu, emma mezkur hadise aptonom rayonluq kömür kan bixeterlikini memuriy teptish qilish we nazaret qilish idarisi teripidin tuyuqsiz yüz bergen weqe keltürüp chiqarghan hadise dep békitilip, xéylongjangliq sodigerge héchqandaq mes'uliyet artilmighan.

Kan igisining köp pul xejlep mes'uliyettin qéchish charisini qollan'ghanliqini perez qilghan dunya Uyghur qurultiyining bayanatchisi dilshat réshit ependi, Uyghur élining mol kömür zapisi buningdin kéyin puldar xitay tijaretchilirining kömür kan échish bazisigha aylinidighanliqini, bixeterlik tedbirliri élinmighan mezkur kanlarda tirikchilik helekchilikide yürgen ishsiz Uyghur yashlirining ishleshke mejbur bolidighanliqi, oxshashla ularning hayatiningmu héchqandaq qimmiti bolmaydighanliqini bildürdi. (Eqide)